Tags-Waqt

aaj phir vasl ke uḌte hue lamhe sun leñ
vaqt ke paaoñ meñ zanjīr hamārī hogī

guzarte vaqt kī sūrat huā na begāna
agar kisī ne pukārā to maiñ Thahar bhī gayā

raas aa.e tum ko mulk-e-ishq kī āb-o-havā
āshiqo har-vaqt shaġhl-e-āh-o-zārī chāhiye

umr bhar kis ne bhalā ġhaur se dekhā thā mujhe
vaqt kam ho to sajā detī hai bīmārī bhī

bād-e-tark-e-ulfat bhī yuuñ to ham jiye lekin
vaqt be-tarah biitā umr be-sabab guzrī

koī ai 'shamīm' kahe zarā ye udaas shā.ir-e-vaqt se
ki hayāt-e-dil ko bujhā na deñ kahīñ fikr-o-fan kī udāsiyāñ

ta.amīr kā to vaqt hai taḳhrīb kā junūñ
ab bhī hai aadmī ko zarūrat shu.ūr kī

syāhī-e-ḳhūn-e-saudā kī ye vaqt-e-qatl kaam aa.ī
lagāyā surma chashm-e-jauhar-e-shamshīr-e-qātil meñ

shahr saarā ḳhauf ke gūñge qile meñ qaid thā
ik ḳhudā-e-vaqt kī hākim sadā kā shor thā

maañ kī āġhosh meñ kal maut kī āġhosh meñ aaj
ham ko duniyā meñ ye do vaqt suhāne se mile

bikhrā huā huuñ vaqt ke shāne pe gard sā
ik zulf-e-pur-shikan huuñ sañvāre mujhe koī

dil meñ gaḌ jaatī hai jab sā.at-e-māzī kī salīb
vaqt ruk jaatā hai insān guzar jaatā hai

maut kā vaqt muayyan hai to phir baat hai kyā
kaun hai mujh meñ jo har saañs pe mar jaatā hai

kyā ayādat ko us vaqt aaoge tum
jab hamārā janāza nikal jā.egā

merī bālīñ pe rone se kiyā fā.eda
kyā mirī maut kā vaqt Tal jā.egā

guzarte vaqt ke vīrāñ jazīroñ kī sazā peshāniyoñ par sabt hai
āzurdagī ke kiil jismoñ meñ gaḌe haiñ

kyā vaqt aa gayā hai mirī nasl par ki ab
merā adū bhī sāhab-e-tauqīr ho chukā

go rañj-e-judā.ī hai dil par be-vaqt hai ye daur-e-sāġhar
baiThe haiñ 'habīb' ahbāb magar ab tum bhī kah do ḳhair chale

ab kaam hamārā yaañ kyā hai ye aanā jaanā bejā hai
jis vaqt tumhārī sohbat meñ ham hoñ aur hukm-e-ġhair chale

vaqt kī vahshī havā kyā kyā uḌā kar le ga.ī
ye bhī kyā kam hai ki kuchh us kī kamī maujūd hai