Tags-Waqt

so gayā to ḳhvāb apne ghar meñ le aa.e mujhe
jaise merī vaqt se pahle rihā.ī ho ga.ī

tum se bichhḌe hue ek muddat huī din guzartā rahā vaqt Taltā rahā
shaam aatī rahī dil dhaḌaktā rahā ham charāġh-e-mohabbat jalāte rahe

hijr kā vaqt batātī hai hamesha 'nomān'
dekhtā huuñ maiñ jo har baar ghaḌī kī āñkheñ

kyā jaane kab utarne lage vo dimāġh par
koī junūñ kā vaqt muqarrar nahīñ huā

Dar rahā huuñ umr kī nā-pā.edārī se 'qatīl'
vaqt ke hāthoñ na jaa.eñ chhin ye mere rāt-din

har nayā lamha hameñ rauñd ke jaatā hai ki ham
apnī muTThī meñ gayā vaqt chhupā.e hue haiñ

vaqt-e-furqat ye karam 'soz' pe barpā kar de
hañs ke kah de ki ye in.ām-e-vafādārī hai

kaisā ajiib rog mire jī ko lag gayā
har vaqt hai kisī se mulāqāt kī talab

hameñ banāoge jis vaqt lashkarī apnā
ḳhatā na hogā kisī taur bhī nishāna tirā

jashn-e-be-chārgī jis vaqt manāte hoñ avaam
nā-munāsib sā hai us vaqt ġhazal-ḳhvāñ honā

adl hai maslahat-e-vaqt ke panje se asiir
saḳht mushkil hai yahāñ sāhab-e-īmāñ honā

kaun vaqt ai vaa.e guzrā jī ko ghabrāte hue
maut aatī hai ajal ko yaañ talak aate hue

sīdhī sīdhī hameñ har-vaqt sunā baiThte ho
naam sun paayā hai sāhab ne hamārā sīdhā

vo vaqt kā jahāz thā kartā lihāz kyā
maiñ dostoñ se haath milāne meñ rah gayā

fareb khā ke junūñ aql ke khilaunoñ se
ḳhudā vo vaqt na laa.e ki maiñ bahal jā.ūñ

ye daur-e-mai-kashī har-vaqt mahv-e-dīd rakhtā hai
kahāñ āñkhoñ meñ ye ġhaflat rahe ḳhvāb-e-girāñ ho kar

ik unheñ dekho ik mujhe dekho
vaqt kitnā karishma-kār sā hai

guzar gayā vaqt dil pe likh kar na jaane kaisī ajiib bāteñ
varaq palaTtā huuñ maiñ jo dil ke to sādgī ab kahīñ nahīñ hai

jāvedāñ qurb ke lamhāt hue haiñ maz.har
tā.ir-e-vaqt kī be-bāl-o-parī to dekho

ik aise vaqt meñ vo donoñ ho ga.e ābād
jahāñ kisī ko ijāzat nahīñ thī aane kī