Tags-Waqt

vaqt jaisā hai ba-har-taur guzar jaanā hai
aaj jo zinda haqīqat hai kal afsāna hai

āshiqī kī ḳhair ho 'sarvar' ki ab is shahr meñ
vaqt vo aayā hai bande bhī ḳhudā hone lage

din nahīñ raat nahīñ sub.h nahīñ shaam nahīñ
vaqt milne kā magar dāḳhil-e-ayyām nahīñ

asar vaqt kā chehre pe dikhlāne ko
aa.ine ko aage aanā paḌtā hai

ga.e vaqt aate haiñ haath kab hue haiñ gañvā ke ḳharāb sab
tujhe karnā hove so kar tū ab ki ye umr barq-e-shattāb hai

ba-vaqt-e-bosa-e-lab kaash ye dil kāmrāñ hotā
zabāñ us bad-zabāñ kī muñh meñ aur maiñ zabāñ hotā

vaqt ke patthar ke nīche ik dabā chashma huuñ maiñ
aao pyāso mil ke ye patthar uThāo to zarā

jaatī hai guzar jī par us vaqt qayāmat sī
yaad aave hai jab terā yak-bārgī aa jaanā

kuchh vaqt chāhte the ki socheñ tire liye
tū ne vo vaqt ham ko zamāne nahīñ diyā

thā pushta reg-e-bād ye ik vaqt kārvāñ
ye gard-bād koī bayābāñ navard thā

havā-e-vaqt ne jhoñkī hai dhuul āñkhoñ meñ
hamārī aañkh meñ lekin chamak bahut hai abhī

us se bichhaḌte vaqt maiñ royā thā ḳhūb-sā
ye baat yaad aa.ī to pahroñ hañsā kiyā

zindagī tūfān thī sailāb thī bhauñchāl thī
vaqt phir bhī karvaToñ par karvaTeñ letā rahā

mil ga.ī haiñ vaqt ko jaane kahāñ kī vus.ateñ
in dinoñ lagtā hai lamhe bhī sadī hone lage

likhā hai vaqt ne sadiyoñ safar ke ba.ad use
ye daur jhuuT sahī phir bhī mo'atabar hai miyāñ

vaqt-e-ḳhirām-e-nāz dikhā do judā judā
ye chaal hashr kī ye ravish āsmāñ kī hai

vaqt ne chaal kaisī chalī ai 'hasan'
dost jaise ko dushman-numā kar diyā

vaqt ḳhud apne chehre se Dar jā.egā
maiñ ne ehsās ko aa.ina kar diyā

fursat kahāñ ki ham se kisī vaqt tū mile
din ġhair kā hai raat tire pāsbāñ kī hai

vaqt ke hāthoñ meñ tiryāk bhī hai zahr bhī hai
us ko yak-rañg samajh kar na bharosā karnā