Tags-Waqt

kabhī jo vaqt zamāne ko detā hai gardish
mire makāñ se bhī kuchh lā-makāñ guzarte haiñ

koī bhī naqsh ho kitnā hī mukammal lekin
vaqt kī gard meñ aT kar nahīñ qaa.em rahtā

shāyad koī rauzan koī khiḌkī nikal aa.e
sar apnā chalo vaqt kī dīvār se māreñ

kalkatta ke hasīnoñ ko jab dekh letā huuñ
us vaqt dil meñ hotā hai saudā-e-lucknow

ġhāliban vaqt mujhe chhoḌ gayā hai pīchhe
ye jo sikka hai mirī jeb meñ chaltā hī nahīñ

ai dil kī ḳhalish chal yūñhī sahī chaltā to huuñ un kī mahfil meñ
us vaqt mujhe chauñkā denā jab rañg pe mahfil aa jaa.e

vaqt hākim hai kisī roz dilā hī degā
dil ke sailāb-zada shahr pe qabza mujh ko

gesū ruḳh par havā se hilte haiñ
chaliye ab donoñ vaqt milte haiñ

vo tund vaqt kī rau hai ki paañv Tik na sakeñ
har aadmī koī ukhḌā huā shajar sā lage

vaqt kā hai ye taqāzā ki maiñ ab chup na rahūñ
aap kyuuñ dekh ke hone lage hairān mujhe

dhaḌkaneñ tham ke ab dhaḌaktī haiñ
sāñseñ har vaqt ab phaḌaktī haiñ

bin tumhāre to suunā sab ghar hai
dil meñ har vaqt ik nayā Dar hai

dil TukḌe TukḌe ho gayā zaḳhmī hai ruuh bhī
itne to tez vaqt ke nashtar kabhī na the

ai ā.īne vaqt ke! tujhe ek baar bhī
ik hasīñ chehra na de sake ham

'goyā' huuñ vaqt kā sulemāñ
pariyoñ par hukm kar rahā huuñ

vaqt baptisma kare āb-e-sitāra se use
dast-e-duniyā kī darāzī se nikaltī huī shaam

baḌī mushkil se ye do vaqt kī roTī kamāte haiñ
sahar se shaam tak fōtpath par qismat banāte haiñ

baḌh gayā had se junūñ aap ke dīvāne kā
vaqt ab aa gayā parde se nikal aane kā

ḳhushī ke vaqt meñ kyoñ ḳhaas sadme yaad aate haiñ
ki hoñToñ pe hañsī ke saath āñkhoñ meñ namī kyoñ ho

dekho vahī to vaqt nahīñ aa rahā hai phir
phir aaj apne saath bahattar hī rah na jaa.eñ