Tags-Waqt

zindagī rāh-e-tasādum meñ bhaTaktī hai abhī
vaqt ke lab pe abhī uzr haiñ paiham kitne

vaqt miltā hī nahīñ hai mujhe tanhā.ī se
jañg ḳhud se hī mirī aaj talak jaarī hai

jab vaqt paḌe dījiye dastak dar-e-dil par
jhukiye fuqarā se na jhamkiye umrā se

vaqt kī ruuh munavvar hai navā se merī
asr-e-nau meñ hai mirī shoḳhī-e-afkār kā rañg

na us ke paas vaqt hai na mujh ko fursat-e-nazar
junūñ ke vāste bhī koī silsila to chāhiye

vaqt-e-aḳhīr aa.e tire kaam jo dilā
ab dhyān-gyān apnā us auqāt meñ lagā

na dekhā baaġh meñ nargis niiñ tujh kuuñ sharm jaane siiñ
isī ġham meñ huī hai sar-nigūñ vo vaqt nahīñ paatī

phir ye huā ki vaqt ne manzar chhupā liye
īd-e-tasavvurāt ziyāda nahīñ rahī

phir ye huā ki vaqt kahīñ jā ke kho gayā
din jab ghaTā to raat ziyāda nahīñ rahī

nigāh-e-shīsha-e-hasrat meñ qaid ho jaate
ye aur baat ki ham vaqt par nikal aa.e

gumrahī rahh-numā.ī ke muqābil aa.ī
vaqt ne dekhiye dīvār pe likkhā kyā hai

vo mujh se milā shaam ke vaqt jab maiñ
parindoñ ke hamrāh ghar jā rahā thā

chup-chāp habs-e-vaqt ke pinjre meñ mar gayā
jhoñkā havā kā aate hī kamre meñ mar gayā

manzar-e-vaqt kī yaksānī meñ baiThā huā huuñ
raat din ek sī vīrānī meñ baiThā huā huuñ

ḳhush-nasībī ye mirī hai ki vo ghar aa.e haiñ
sham.a tū saath nibhā vaqt-e-azāñ hone tak

maiñ ne bhī apnī palkeñ bhigoīñ nahīñ 'nigār'
vo bhī bichhaḌte vaqt pareshāñ nahīñ huā

ab mire paas aur vaqt nahīñ
saañs har lahza iztirāb meñ hai

vo vaqt kabhī to aa.egā jab dil ke chaman lahrā.eñge
mar jā.ūñ to kyā marne se mire ye ḳhvāb nahīñ mar jā.eñge

āshiqī kī ḳhair ho 'sarvar' ki ab is shahr meñ
vaqt vo aayā hai bande bhī ḳhudā hone lage