Tags-Waqt

raat ghanerī ghor ghaTā.eñ sāvan sī barsāt 'alī'
yaad kā panchhī vaqt-e-āḳhir aañkh meñ paanī tū aur maiñ

baiThnā sāhil pe dariyā kī ravānī dekhnā
aur ḳhālī vaqt meñ filmeñ purānī dekhnā

vaqt ke be-rahm sannāToñ meñ bahtī zindagī
hai sadā kī muntazir koī pukāre kuchh na kuchh

vaqt suntā hai jin kī āvāzeñ
haa.e vo log marte jaate haiñ

Thahar gayā hai sar-e-markaz-e-falak sūraj
ye vaqt vo hai ki dīvār meñ bhī saayā nahīñ

zanjīr-e-girāñ-bār hai ye ishrat-e-sāhil
bahtā hai to ruktā hī nahīñ vaqt kā dhārā

vaqt ke paas nahīñ zaḳhm-e-mohabbat kā ilaaj
vaqt ke saath ye nāsūr bhī ho saktā hai

vaqt kī dhuup meñ kho.e mire nashshe kitne
ik tirī chashm-e-ḳharābāt abhī baaqī hai

pas-e-nazar ho agar maqsad-e-hayāt to phir
ye ziist vaqt guzārī hai zindagī kyā hai

tū ghar se nikal aa.e to dhartī ko jagā de
tū baaġh meñ jis vaqt lachaktī huī aa.e

ik udaas bastī meñ vaqt-e-shab maiñ gayā to aise makāñ the sab
na to khiḌkiyoñ meñ the māh-rū na charāġh un ke daroñ meñ the

vaqt kī aa.e din kī raaḌ ziist kī dam-ba-dam latāḌ
us pe ġhamoñ kī chheḌ-chhāḌ koī na kyuuñ chiḌā kare

vaqt-e-āḳhir to nikal jaa.e tamannā merī
vo na aise meñ bhī aa.eñ kahīñ aisā na kareñ

merī hastī gavāh hai ki mujhe
tū kisī vaqt bhūltā hī nahīñ

hai satāne kā bhī lutf ik vaqt par
har ghaḌī un ko satānā kuchh nahīñ

'ehsān' apnā koī bure vaqt kā nahīñ
ahbāb bevafā haiñ ḳhudā be-niyāz hai

ham aaj hañste hue kuchh alag dikhā.ī diye
ba-vaqt-e-girya ham aise the, saare jaise haiñ

sūraj kī shuāoñ se ulajhtā hai musalsal
saaya hai abhī vaqt kī bāhoñ meñ paḌā hai

tārīḳh batā.egī vo qatra hai ki dariyā
aañsū hai abhī vaqt ke qadmoñ meñ paḌā hai

har guzarte hue lamhe meñ Tapaktā huā meñ
dard huuñ, vaqt ke a.asāb meñ aayā huā huuñ