Tags-Waqt

sher tāsīr se ḳhālī huā vaqt-e-tābīr
nafs-e-mazmūn bhī taqrīr banāne meñ gayā

hameñ is hikmat-e-daurāñ kā ik nukta bahut hai
agar dhun hai ulaT deñ vaqt ke daao to aao

aa rahā hai koī phir dām-e-nazar meñ 'ja.afar'
aise manzar se nigāheñ na haTānā is vaqt

ye ghaḌī koī farāmosh nahīñ kar saktā
merī āñkhoñ meñ hai ik ḳhvāb suhānā is vaqt

rasm-e-tajdīd-e-marāsim bhī zarūrī hai magar
yaad aayā hai mujhe vaqt purānā is vaqt

karb-e-tanhā.ī kī tāvīl to mushkil hai bahut
kaise chup-chāp huā aap kā aanā is vaqt

dil-e-nādāñ koī mahshar na uThānā is vaqt
aa rahā hai mirī bātoñ meñ zamānā is vaqt

na leT is tarah muñh par zulf ko bikhrā ke ai zālim
zarā uTh baiTh tū is dam ki donoñ vaqt milte haiñ

jab ziist ke mushkil lamhoñ meñ apne bhī kinārā karte
us vaqt bhī ham ai ahl-e-jahāñ hañs hañs ke guzārā karte haiñ

manzil kā ta.ayyun hai na sāñsoñ kā bharosa
maiñ vaqt kī taqlīd meñ bas dauḌ rahā huuñ

hamārī āñkhoñ se shabnam Tapak rahī hai abhī
yahī to vaqt hai us gul kī rū-numā.ī kā

'shahpar' sada-e-vaqt se kar lo musālahat
mahrūmiyoñ ke dar pe koī kyuuñ paḌā rahe

kamre meñ mere dhuup kā aanā ba-vaqt-e-sub.h
āñkhoñ meñ kaash ek hī manzar basā rahe

saath meñ rah kar bhī us se
chalte vaqt hī milte the

vaqt ke badle hue ruḳh ne panāheñ chhīn liiñ
ham pas-e-dīvār baiThe haiñ magar saaya nahīñ

dil jalāo yā diye āñkhoñ ke darvāze par
vaqt se pahle to aate nahīñ aane vaale

vaqt tūfān-e-balā-ḳhez ke gardāb meñ hai
sar pe mere mirā āñchal nahīñ rahne detā

hai dil-e-ushshāq tere jām-o-mīnā bin ḳharāb
rahm kar is vaqt par saaqī piyāla de shitāb

guzarte vaqt kisī ko ḳhabar nahīñ thī yahāñ
ki ek dam se diloñ par ye ḳhāk-dāñ khulegā

jo fasl ḳhvāb kī tayyār hai to ye jaano
ki vaqt aa gayā phir dard koī bone kā