Tags-Waqt

bichhaḌte vaqt thā dil meñ ġhubār us se magar
suḳhan hī talḳh na lahja shikāyatāna huā

vaqt kī baat hai kyā vaqt guzar jā.egā
aur kuchh der chalo gardish-e-ayyām ke saath

mirā vaqt mujh se bichhaḌ gayā mirā rañg-rūp bigaḌ gayā
jo ḳhizāñ se baaġh ujaḌ gayā maiñ usī kī fasl-e-bahār huuñ

do jhīleñ us kī āñkhoñ meñ lahrā ke so ga.iiñ
us vaqt merī umr kā dariyā chaḌhā na thā

jab agle saal yahī vaqt aa rahā hogā
ye kaun jāntā hai kaun kis jagah hogā

dil ko mahv-e-ġham-e-dildār kiye baiThe haiñ
riñd bante haiñ magar zahr piye baiThe haiñ

vaqt paḌ jaa.e to ham sīna-sipar jaate haiñ
naam hī naam nahīñ kaam bhī kar jaate haiñ

mujhe aatā hai kyā kyā rashk vaqt-e-zab.h us se bhī
galā jis dam lipaT kar ḳhanjar-e-qātil se miltā hai

dil se na vahī aur haiñ 'manzar' na hamīñ aur
ye vaqt hai jo ham haiñ kahīñ aur vo kahīñ aur

vaqt ne aarzū kī lau der huī bujhā bhī dī
ab bhī pighal rahe haiñ aap aap bahut ajiib haiñ

zindagī kā hī nahīñ Thor-Thikāna ma.alūm
maut to tai hai ki kis vaqt kahāñ aanī hai

vaqt se manzar-e-saffāk tarāshā na gayā
dīda-e-tar meñ tire gosha-nashīñ koī thā

mujh ko manzūr hai vo silsila-e-sañg-e-girāñ
kohkan mujh se agar vaqt badalnā chāhe

nabz-e-ayyām tire khoj meñ chalnā chāhe
vaqt ḳhud shīsha-e-sā.at se nikalnā chāhe

kyuuñ na ġhāfil ho farā.ez se zamāna 'mānī'
kam yahāñ vaqt guzārī ke mashāġhil to nahīñ

hudūd-e-vaqt se bāhar ajab hisār meñ huuñ
maiñ ek lamha huuñ sadiyoñ ke intizār meñ huuñ

bazm-e-kaunain murattab huī terī ḳhātir
vaqt hai tere liye is meñ jo maal achchhā hai

ham ki bas ek vaqt khāte haiñ
shaal kashmīr se mañgāte haiñ

kyā taqāze haiñ vaqt ke 'sarshār'
soz ko āshnā-e-sāz karo

mimbar-o-mehrāb se ātish-fishāñ hote to haiñ
vaqt kī dahlīz par dastār rakh jaatā hai kaun