Tags-Waqt

vaqt ne qadr kī nahīñ varna
vaqt kā ham-safar rahā huuñ maiñ

tanhā.ī meñ karnī to hai ik baat kisī se
lekin vo kisī vaqt akelā nahīñ hotā

hamāre baa'd agar rustaḳhez ho bhī to kyā
bisāt-e-vaqt se ham to ga.e guzar ḳhāmosh

vaqt ke zālim samundar meñ pareshānī ke saath
Duub jaatā hai koī kyuuñ itnī āsānī ke saath

jab maslahat-e-vaqt se gardan ko jhukā kar
vo baat kare hai to koī tiir lage hai

guzarte vaqt ko buniyād karne vaalā huuñ
jo sab bhulāte haiñ vo yaad karne vaalā huuñ

ġham-e-mohabbat satā rahā hai ġham-e-zamāna masal rahā hai
magar mire din guzar rahe haiñ magar mirā vaqt Tal rahā hai

vaqt madārī hai kyā jaane khel apnā kab ḳhatm kare
sāñsoñ kī is Dor pe chalte ek zamāna biit gayā

mire vajūd pe nafrat kī gard jamtī rahī
milā na vaqt use āñsuoñ se dhone kā

muḳhtalif shakleñ banānā vaqt kā
bas yahī to gardish-e-ayyām hai

tū us nigāh se pī vaqt-e-mai-kashī 'tābāñ'
kī jis nigāh pe qurbān pārsā.ī ho

kabhī to vaqt kī sarhad ke paar utrūñgā
ki buuñd buuñd samundar ko pī rahā huuñ maiñ

kyā vaqt kī dahlīz pe dastak hai kisī kii?
soī huī duniyā ko sahar DhūñD rahī hai

vaqt kī dhuul meñ ulajh kar bhī
zinda rahtā hai saañs letā hai

vaqt kī mahrūmiyoñ ne chhīn lī merī zabān
varna ik muddat talak maiñ lā-javāboñ meñ rahā

hañs rahā thā maiñ bahut go vaqt vo rone kā thā
saḳht kitnā marhala tujh se judā hone kā thā

dil ki sohbat mujhe har vaqt javāñ rakhtī hai
aql ke saath chalā jā.ūñ to buDDhā ho jā.ūñ

mujh se kahtā hai ki kuchh apnī ḳhabar le baabā
dekh tū vaqt ko barbād bahut kartā hai

kisī kā naam sunte vaqt mujh ko
tumhārā naam yaad aayā bahut hai

vaqt ne luuTe haiñ hastī ke ḳhazāne kitne
ḳhaak kā Dher hue qasr na-jāne kitne