Tags-Waqt

hamāre haath se ai 'zauq' vaqt-e-mai-noshī
hazār naaz se vo ek jaam lete haiñ

tire ḳhirām ke pairū haiñ jitne fitne haiñ
qadam sab aan ke vaqt-e-ḳhirām lete haiñ

hameñ ye vaqt kī baḳhiya-garī pasand nahīñ
agarche vaqt ke hāthoñ se zaḳhm silte haiñ

maiñ tirā vaqt huuñ aur ruuTh ke jaane lagā huuñ
rok le yaar maiñ jā kar nahīñ aayā kartā

ik tasvīr nihāñ thī vaqt ke parde meñ
ġhaur se jo maiñ ne pahchānī merī thī

vaqt ḳhāmosh hai rūThe hue yāroñ kī tarah
kaun lau dete hue zaḳhmoñ ko sahlā.egā

maiñ huuñ ye ghaTtā phailtā saaya maiñ ye kaise ho saktā huuñ
vaqt ke sayyāl ā.īne meñ kaun hai kis ko dekh rahā huuñ

phir yuuñ huā ki pyaas hī 'mahbūb' mar ga.ī
jis vaqt maiñ kueñ ke dahāne pe aa gayā

bas ek vaqt kā ḳhanjar mirī talāsh meñ hai
jo roz bhes badal kar mirī talāsh meñ hai

milā diyā hameñ apnoñ se shukriya ai vaqt
yahī mile the hameñ yuuñ tabāh dekhne ko

sat.h-e-dariyā kā ye saffāk sukūñ hai dhokā
ye tirī naav kisī vaqt Dubo saktā hai

un ke katbe pe yahī vaqt ne likkhā hai ki vo
raushnī bāñTte the tiira nazar kahlā.e

ātish-e-taġha.īr ke hāthoñ pighal jaate haiñ sab
vaqt kī bhaTTī meñ tap kar ik na.e sāñche meñ Dhal jaate haiñ sab

guzre vaqtoñ ye ibārat meñ to kho kar rah gayā
vaqt ke māthe kī tahrīroñ kā tū qaarī nahīñ

merī ye aarzū hai vaqt-e-marg
us kī āvāz kaan meñ aave

tamām umr diye maiñ ne vaqt ko ta.ane
abhī sukūn hai thoḌā sudhar gayā hai abhī

jī chāhe to aur bhī ruk le palkoñ kī chhāñv meñ
maiñ ne to tujh ko vaqt kā bas ehsās dilāyā thā

tanhā.ī kā ġham tum ko us vaqt maza degā
merī hī tarah tum bhī ho jaao agar tanhā

vo jo do vaqt kā rahe bhūkā
mutma.in kyā ho do nivāle se