Tags-Waqt

vo pech-o-ḳham jahāñ kī har ik rahguzar meñ hai
ḳhud kārvān-e-vaqt bhī ab tak safar meñ hai

tujh se tire kūche kā pata pūchh rahā huuñ
is vaqt ye aalam hai mirī be-ḳhabarī kā

is vaqt mire kalba-e-ġham meñ tirā aanā
bhaTkā huā jhoñkā hai nasīm-e-saharī kā

vaqt-e-duniyā ko samajhne meñ kareñ zaayā kyā
haif ab tak to na ham hī samajh aa.e ḳhud ko

kyuuñ bhalā vaqt kā nuqsān karoge pyāre
jo yahāñ ab hai tamāshā vahī us paar bhī hai

vaqt kī rāgnī giit gaatī rahī
aur maiñ giit kī dhun banātī rahī

kamān-e-vaqt ne ham ko hadaf banāyā hai
kahīñ se tiir chalegā hamīñ pe aa.egā

jis meñ tasvīr nazar aatī thī har vaqt tirī
aa.ina TuuT gayā ab vo tumhārā likkhūñ

nuqta-e-sifr par vaqt kā paañv thā
zad meñ sailāb kī jab har ik gaañv thā

'firāq' vaqt ke ruḳh se ulaT rahī hai naqāb
zamīñ se tā-ba-falak hai is inqalāb kī aañch

vaqt ne jab aa.ina ham ko dikhāyā ro paḌe
apnī sūrat aap hī pahchānñā mushkil huā

le aa.ī chhat pe kyuuñ mujhe be-vaqt kī ghuTan
terī to ḳhair baam pe aane kī umr hai

ranjisheñ dil meñ rakhnā burī baat hai kyuuñ na phir ibtidā se mohabbat kareñ
aao pahle sañvāreñ shab-e-ġham ko ham vaqt hogā to ḳhud bhī sañvar jā.eñge

sā.ateñ be-sabātī kī aulād haiñ aur sayyād haiñ is liye aao ham
vaqt ko toḌ deñ varna sab kaam kī rāteñ Dhal jā.eñgī din guzar jā.eñge

vaqt detā hai jinheñ aaj khilaune 'aḳhtar'
unhīñ atfāl ko kal tīr-o-sināñ bhī degā

hākim-e-vaqt ko kis kis ne salāmī dī hai
kis kī taalī meñ hai sur-tāl batā dete haiñ

kyā vaqt paḌā hai ai ġham-e-jāñ
ḳhud apnā vajūd khal rahā hai

vaqt kahtā hai hameñ duur hī rahnā hogā
ham ko har haal meñ majbūr hī rahnā hogā

zindagī hai ki kisī shaah kī begam jis ko
vaqt bāzār meñ laayā hai barhana kar ke

haa.e afsos huī kaun sī sohbat barḳhāst
shab ko me.arāj meñ the vaqt-e-sahar kuchh bhī nahīñ