Tags-Waqt

kisānoñ ko mayassar jab nahīñ do vaqt kī roTī
to aise khet ko be-sūd-o-banjar likh diyā jaa.e

sitamgaroñ se Darūñ chup rahūñ nibāh karūñ
ḳhudā vo vaqt na laa.e maiñ ye gunāh karūñ

shahādat mile chaar tan suuñ tujhe gar kare qatl tū pāñch mūziyāñ kuuñ dil ke
shahīdoñ kī rah saath har vaqt hamdam ho jyuuñ sher sherān jañgoñ meñ rahiye

tum ne shāyad kabhī is baat ko sochā hogā
vaqt hāthoñ kī lakīreñ bhī miTā detā hai

vaqt itnā guzar chukā hai 'hinā'
jaane vaale se ab gila bhī nahīñ

tum vaqt-e-sahar rauzan-e-dīvār meñ dekho
laalī sī kahīñ sub.h ke āsār meñ dekho

vaqt o hālāt se ḳhvāhish thī faqat chand hī roz
qaid-e-lamhāt se bāhar mujhe rahne dete

ye vaqt ba-har-hāl guzar jā.egā lekin
rah jā.egī aahoñ kī hameñ be-asarī yaad

koī bhī vaqt ho terā hī zikr kartī hai
kabhī to pūchhe hamārā bhī haal tanhā.ī

vo ek naam jo tum ne miTā diyā hai abhī
jabīn-e-vaqt pe tahrīr ban gayā shāyad

ye hai mai-ḳhāna yahāñ vaqt kā ehsās na kar
gardish-e-vaqt yahāñ jaam meñ Dhal jaatī hai

ye mere dil kī pagDanDī pe chaltī nazm hai koī
ki sail-e-vaqt kī bhaTkī huī ik lahr sā lamha

vaqt muTThī meñ hogā tab tire paas
haath par jab ghaḌī nahīñ hogī

vaqt ke qadr-dāñ kī nazroñ meñ
zindagī muḳhtasar nahīñ hotī

apnī barbādī kā zimmedār maiñ yā koī aur
zehn meñ har vaqt mere ye gumāñ baḌhtā gayā

ruuh ne chhoḌā jo tanhā jism ko vaqt-e-nazā.a
ba.ad phir us ke firāq-e-jism-o-jāñ baḌhtā gayā

fasādāt dekhe the taqsīm ke vaqt tum ne
havā meñ uchhalte hue DanThaloñ kī tarah shīr-ḳhvāroñ ko dekhā thā kaTte

ham apne aap ko paane meñ is qadar gum the
hameñ milā hī nahīñ vaqt us ko khone kā

ye kis ḳhayāl meñ din-rāt ab guzarte haiñ
na jāgne kā koī vaqt hai na sone kā

do vaqt nikalne lagī lailā kī savārī
dilchasp huā qais ke rahne se ban aisā