Tags-Waqt

bas tirā ism munājāt meñ rakkhā huā hai
gardish-e-vaqt ko auqāt meñ rakkhā huā hai

kyuuñ un se vaqt-e-qatl kiyā shikva ġhair kā
karnī thī maġhfirat hī kī apnī duā mujhe

maiñ to shāyad vaqt ke sāñche meñ Dhal jaatā 'nisār'
koī mujh ko māvarā kī dāstāñ samjhā gayā

dekh yuuñ vaqt kī dahlīz se Takrā ke na gir
rāste band nahīñ sochne vāloñ ke liye

yuuñ na reñgtī rahtīñ kāġhazoñ pe tasvīreñ
vaqt jo milā hotā bāl-o-par banāne kā

vaqt kī mīzān par bīnā.ī ḳhandāñ hai 'sharar'
kor-bīnoñ meñ bhī ab dīda-varī kā karb hai

jāgte din kī galī meñ raat āñkheñ mal rahī hai
vaqt guzrā jā rahā hai dhuup chhat se Tal rahī hai

sarisht-e-husn kā tabdīl honā ġhair-mumkin hai
sarisht-e-ishq meñ jis vaqt tak armān baaqī hai

haañ mujh pe sitam bhī haiñ bahut vaqt ke lekin
kuchh vaqt kī haiñ mujh pe ināyāt vo tum ho

mere ham-rāh zarā der ko chal kar 'tāriq'
aur kuchh vaqt kī raftār baḌhā dī us ne

ghuTā ghuTā sā na rah tajraboñ ke mahbas meñ
sarīr-e-vaqt kī rāhoñ se tū kitāb meñ aa

asbāb mirā dekh ke hañsne lage ahbāb
kyā vaqt-e-safar saath liyā jaa.e hai kuchh aur

vaqt har saañs ke badle meñ pasīna māñge
dil ye chāhe ki ho āsān bhī āsāñ kuchh aur

tiflī ke girye kā ye khulā haal vaqt-e-marg
āġhāz hī meñ rote the anjām ke liye

vaqt har moḌ pe dīvār khaḌī kar degā
vaqt kī qaid se ghabrā ke jidhar jāoge

vaqt ye aur hai mujh meñ ye kahāñ taab ki maiñ
yāriyāñ jhel sakūñ dushmaniyāñ Thaan sakūñ

vaqt kī taaq pe donoñ kī sajā.ī huī raat
kis pe ḳharchī hai batā merī kamā.ī huī raat

lahad vahī hai magar aa chuke na.e murde
to vaqt laash kī sab bāqiyāt le ke gayā

phir purānī rasmeñ haiñ aur phir vahī duniyā darmiyāñ meñ haa.el hai
vaqt aur samay kā tarjumāñ to maiñ bhī huuñ tarjumāñ to tum bhī ho

shādī-o-marg ne ye nukta batāyā hai ki vaqt
tez-raftār bhī hotā hai nahīñ bhī hotā