Tags-Yaad

tumhārī yaad mire dil kā daaġh hai lekin
safar ke vaqt to be-tarah yaad aatī ho

bahut ziyāda na piinā ki kuchh na yaad aa.e
jo lucknow meñ huā thā vo ab dobāra na ho

use aañsū na kah ik yād-e-ayyām-e-guzishta hai
mirī umr-e-ravāñ ko umr-e-rafta kā salām aayā

vo yaad aa.e to apnā vajūd hī na mile
na yaad aa.e to mujh ko thakan ziyāda ho

yaad aate haiñ mujh ko vo fankār
zindagī-bhar jo zahar pī ke jiye

kuchh ġhuncha-laboñ kī yaad aa.ī kuchh gul-badanoñ kī yaad aa.ī
jo aañkh jhapakte biit ga.iiñ un anjumanoñ kī yaad aa.ī

majrūh guloñ ke dāman meñ paivand lage haiñ ḳhushbū ke
dekhā jo bahāroñ kā ye chalan sunsān banoñ kī yaad aa.ī

thī hosh-o-ḳhirad se kis ko ġharaz arbāb-e-junūñ ke halqe meñ
jab fasl-e-bahārāñ chīḳh uThī tab pairahnoñ kī yaad aa.ī

kyā kam hai karam ye apnoñ kā pahchānñe vaalā koī nahīñ
jo des meñ bhī pardesī haiñ un ham-vatanoñ kī yaad aa.ī

shīrīñ kī adāoñ par maa.il parvez kī satvat se ḳhā.if
jo ban na sake farhād kabhī un tesha-zanoñ kī yaad aa.ī

chhāyā hai 'qatīl' akasr dil par nādīda nazāroñ kā jaadū
ham bādiya-paimā the lekin phir bhī chamanoñ kī yaad aa.ī

jaltā huuñ hijr-e-shāhid o yād-e-sharāb meñ
shauq-e-savāb ne mujhe Daalā azaab meñ

kyā jalve yaad aa.e ki apnī ḳhabar nahīñ
be-bāda mast huuñ maiñ shab-e-māhtāb meñ

ham ne tum se rakh ke ummīd-e-karam
vo sabaq sīkhā ki ab tak yaad hai

yād-e-abrū meñ hai 'akbar' mahv yuuñ
kab tirī ye kaj-ḳhayālī jā.egī

va.ada na dilāo yaad un kā
nādim huuñ ḳhud e'tibār kar ke

dil ye kahtā hai ki de iiñT kā patthar se javāb
jo tujhe bhūle use tū bhī kabhī yaad na kar

apne hālāt ko behtar jo banānā hai tujhe
ahd-e-rafta ko kabhī bhuul ke bhī yaad na kar

phir kisī kī yaad ne taḌpā diyā
phir kaleja thaam kar ham rah ga.e

mujhe yaad aa rahā hai koī āñso.oñ meñ Dhal ke
koī aa gayā yahāñ bhī mire saath saath chal ke