Tags-Yaad

tumhārī yaad meñ jiine kī aarzū hai abhī
kuchh apnā haal sambhālūñ agar ijāzat ho

jaate jaate aap itnā kaam to kiije mirā
yaad kā saarā sar-o-sāmāñ jalāte jā.iye

mujhe ḳhabar thī ki ab lauT kar na ā.ūñgā
so tujh ko yaad kiyā dil pe vaar karte hue

kyā qayāmat hai 'munīr' ab yaad bhī aate nahīñ
vo purāne āshnā jin se hameñ ulfat bhī thī

zaḳhm-e-sar kī dāstāñ ab yaad bhī aatī nahīñ
āshnā the kis qadar pahle ye patthar aur ham

ye dil ga.e hue logoñ kī yaad se raushan
is aa.ine meñ bahut aks ubharte rahte haiñ

pīchhe chhūTe sāthī mujh ko yaad aa jaate haiñ
varna dauḌ meñ sab se aage ho saktā huuñ maiñ

haa.e vo shaḳhs jo kartā thā hamārī ḳhvāhish
raqs-e-tanhā.ī meñ aaj us ko bahut yaad kiyā

sāñsoñ ko us kī yaad se nisbat hai aaj bhī
mujh meñ kisī bhī taur sahī bāñkpan to hai

in kī jab nukta-varī yaad aa.ī
apnī hī be-ḳhabarī yaad aa.ī

yaad aa.ī bhī to yuuñ ahd-e-vafā
aah kī be-asarī yaad aa.ī

aaj kyuuñ un ko ba-āġhosh-e-raqīb
merī hī ham-asarī yaad aa.ī

dil ne phir vaqt se laḌnā chāhā
phir vahī dard-bharī yaad aa.ī

apnā siina huā raushan to unheñ
husn kī kam-nazarī yaad aa.ī

jab bhī dhyān aayā kahīñ manzil kā
raah kī shab-basarī yaad aa.ī

kis ko hāsil hai dimāġh-e-nāla
be-sabab be-hunarī yaad aa.ī

dekh kar be-dilī-e-shauq kā rañg
apnī āshufta-sarī yaad aa.ī

us pe kyā guzrī jo is aalam meñ
phuul ko jāma-darī yaad aa.ī

baaġh kā haal vo dekhā hai 'nazar'
shāḳh thī jo bhī harī yaad aa.ī

use udāsī meñ yaad karnā ki yaad kar ke udaas honā
ye pūchh ham se hai kitnā mushkil bikharnā aur ḳhud ko joḌnā phir