Tags-Yaad

maiñ terī yaad se niklā to apnī yaad aa.ī
ubhar rahe haiñ miTe shahr ke nishāñ phir se

dī qasam vasl meñ us but ko ḳhudā kī to kahā
tujh ko aatā hai ḳhudā yaad hamāre hote

niklī huuñ kisī dhun meñ kisī yaad ko le kar
aur ujḌī adāoñ meñ tujhe DhūñD rahī huuñ

kyā kyā frāġhateñ thiiñ 'tabassum' hameñ ki jab
dil par kisī kī yaad kā saaya paḌā na thā

phir aaj biite hue mausamoñ kī yaad aa.ī
phir aaj reñgte lamhoñ se dostāna huā

ai bād-e-sabā un se ye kah dījiyo jā kar
pardes meñ ik shaḳhs tumheñ yaad kare hai

aave hai terā naam to hans deve hai aksar
dīvāna terā yuuñ bhī tujhe yaad kare hai

likh likh ke miTā deve hai tū naam ye kis kā
sach kahiyo 'sarosh' aaj kise yaad kare hai

mujhe to is darja vaqt-e-ruḳhsat sukūñ kī talqīn kar rahe ho
magar kuchh apne liye bhī sochā maiñ yaad aayā to kyā karoge

laboñ par tabassum to āñkhoñ meñ aañsū thī dhuup ek pal meñ to ik pal meñ bārish
hameñ yaad hai bātoñ bātoñ meñ un kā hañsānā rulānā rulānā hañsānā

jaatī hī nahīñ dil se tirī yaad kī ḳhushbū
maiñ daur-e-ḳhizāñ meñ bhī mahaktā hī rahā huuñ

sabz rutoñ meñ aksar mujh ko yaad aayā
us ne ḳhat meñ sūkhā pattā bhejā thā

ab aap aa ga.e haiñ to aatā nahīñ hai yaad
varna hameñ kuchh aap se kahnā zarūr thā

hanūz yaad hai 'jauhar' ko ai nigār-e-jamīl
vo iltifāt ke parde meñ ijtināb tirā

jab tujh se zarā ġhāfil Thahre har yaad ne dil par dastak dī
jab lab pe tumhārā naam na thā har dukh ne pukārā us din thā

thī sard yaad kī havā maiñ dasht meñ thā maazī ke
na pūchhiye janāb maiñ ne kaise raat paar kī

yaad ḳhushbū hai chhupāne se kahāñ chhuptī hai
mauj-e-gul ḳhud hī banā letī hai rasta apnā

bas itnā yaad hai ik bhuul sī huī thī kahīñ
ab is se baḌh ke dukhoñ kā hisāb kyā rakhnā

aaj tak sub.h-e-vatan yaad hai ham ko 'aḳhtar'
dard-e-hijrāñ kī qasam shām-e-ġharībāñ kī qasam

in āñsuoñ se bhalā merā kyā bhalā hogā
vo mere ba.ad jo royā bhī yaad kar ke mujhe