Tags-Yaad

haañ yaad hameñ bhī kar lenā āsā.ish-e-manzil se pahle
ai qāfile vaalo ġham na karo ai manzil-e-jānāñ ham na sahī

bhuul kar bhī us sitam-parvar kī phir aa.e na yaad
is qadar begāna-e-ahd-e-vafā ho jā.iye

tū jafāoñ se jo badnām kiye jaatā hai
yaad aa.egī tujhe merī vafā mere baad

ab vo galiyāñ vo makāñ yaad nahīñ
kaun rahtā thā kahāñ yaad nahīñ

jalva-e-husn-e-azal the vo dayār
jin ke ab nām-o-nishāñ yaad nahīñ

koī ujlā sā bhalā sā ghar thā
kis ko dekhā thā vahāñ yaad nahīñ

yaad hai zīna-e-pechāñ us kā
dar-o-dīvār-e-makāñ yaad nahīñ

yaad hai zamzama-e-sāz-e-bahār
shor-e-āvāz-e-ḳhizāñ yaad nahīñ

ab ġharq huuñ maiñ aaTh pahar mai kī yaad meñ
tauba ne mujh ko aur gunahgār kar diyā

ye kis kā chehra damaktā hai merī āñkhoñ meñ
ye kis kī yaad mujhe kahkashāñ se aatī hai

aatī hai yaad sub.h-e-masarrat kī baar baar
ḳhurshīd aate aate use kal uThā to lā

pābandi-e-aqdār meñ āzād rahegā
lekin ye tirā jaur-o-sitam yaad rahegā

'farhat' tire naġhmoñ kī vo shohrat hai jahāñ meñ
vallāh tirā rañg-e-suḳhan yaad rahegā

kyā tumheñ yaad hai insān huā karte the
ye bayābāñ kabhī gunjān huā karte the

yād-e-ayyām baḌī talḳh zamīñ hai 'āsim'
is zamīñ meñ kabhī dīvān huā karte the

sab lahū jam gayā ubaal ke biich
kaun yaad aa gayā visāl ke biich

aap kī yaad se maiñ to kabhī ġhāfil na rahā
aap kahte haiñ tujhe ḳhvāb meñ ġhāfil dekhā

mujh ko ka.abe meñ bhī hamesha shaiḳh
yād-e-ayyām-e-but-parastī thī

yaad use ik pal bhī karne kī mujhe fursat nahīñ
mubtalā sadiyoñ se merā dil hai jis ke pyaar meñ

mumkin hai mire baad bhulā deñ mujhe lekin
tā umr unheñ merī vafā yaad rahegī