Tags-Yaad

sochtā huuñ sunā.ūñ kyā ahd-e-sitam kī dāstāñ
kahtā huuñ ḳhair chhoḌiye yaad nahīñ rahā mujhe

ai dil tujhe natīja-e-ulfat hai ḳhuub yaad
aur phir bhī aarzū tujhe kū-e-butāñ kī hai

apnī tahzīb jise log bhulā baiThe the
ved-mantar se vahī yaad dilātā aayā

yaad kisī kī aa ga.ī kaT ga.ī zindagī kī raat
varna kahāñ numūd-e-sub.h aisī shab-e-darāz meñ

kaifiyyat-e-chashm us kī mujhe yaad hai 'saudā'
sāġhar ko mire haath se liijo ki chalā maiñ

raat yuuñ dil meñ tirī khoī huī yaad aa.ī
jaise vīrāne meñ chupke se bahār aa jaa.e

zamāna badlā miTī javānī na vo mohabbat na zindagānī
bas ek bholī sī yaad hai jo ba-rañg-e-dāġh-e-kuhan hai baaqī

yahī kaheñge ki bas sūrat-āshnā.ī thī
jo ahd TuuT chukā yaad kyā dilānā vo

ham jo tujh se phireñ ḳhudā se phireñ
yaad hai kuchh ye qaul kis kā thā

phir dar-e-dil pe kisī yaad ne dastak dī hai
phir bahā kar mujhe le jā.egā dariyā koī

na dil apnā huā apnā na ik but par huā qaabū
kareñge yaad kiyā ham ai ḳhudā tere ḳhudā.ī ko

mahfil-e-rañg-o-nūr kī phir mujhe yaad aa ga.ī
phir mujhe yaad aa gayā ek diyā bujhā huā

dil se ik yaad bhulā dī ga.ī hai
kisī ġhaflat kī sazā dī ga.ī hai

bhīgī raat kā sannāTā kartā hai vahī bāteñ
zaḳhm hare hote haiñ jo bāteñ yaad aane se

tirā mai-ḳhvār ḳhush-āġhāz-o-ḳhush-anjām hai saaqī
ki dil meñ yaad terī lab pe terā naam hai saaqī

Dhalegī shaam jahāñ kuchh nazar na aa.egā
phir is ke ba.ad bahut yaad ghar kī aa.egī

hamāre ḳhvāb bhī apne kahāñ haiñ
kisī kī yaad ne aa kar bune haiñ

rasta ho agar yaad to ghar lauT bhī jā.ūñ
laa.ī thī kisī aur kī bīnā.ī yahāñ tak

hameñ to yaad bahut aayā mausam-e-gul meñ
vo surḳh phuul sā chehra khilā huā ab ke

dil kī nāzuk rageñ TūTtī haiñ
yaad itnā bhī koī na aa.e