Tags-Yaad

baiTh kar sāya-e-gul meñ 'nāsir'
ham bahut ro.e vo jab yaad aayā

ik faqat yaad hai jaanā un kā
aur kuchh is ke sivā yaad nahīñ

tumhāre husn se rahtī hai ham-kanār nazar
tumhārī yaad se dil ham-kalām rahtā hai

jab sabā aa.ī idhar zikr-e-bahār aa hī gayā
yaad ham ko inqalāb-e-rozgār aa hī gayā

haiñ vo 'āshiq' ki jagah pā ke na nikle dil se
yaad aa.e to junūñ mujh se bhulā.e na ga.e

yaad ashkoñ meñ bahā dī ham ne
aa ki har baat bhulā dī ham ne

silsila yaad kā jab zehn meñ jaag uThtā hai
ek dariyā sā umaD aatā hai ā.īne meñ

vo zulf dhuup meñ furqat kī aa.ī hai jab yaad
to bādal aa.e haiñ aur shāmiyāne ho ga.e haiñ

ain-mumkin hai taḌap uThnā hamārā ek din
yaad meñ allāh kī yād-e-sanam karte hue

ulfat ke ahd-e-mohkam meñ buude kāġhaz kī zamānat kyā
ye dil se dil kī bāteñ haiñ rakh yaad faqat tahrīr na kar

chashm-e-mast-e-siyah kī yaad mudām
shīsha-e-dil meñ hai sharāb kī tarah

bhuul gayā huuñ sab kuchh 'sālim' mujh ko kuchh bhī yaad nahīñ
yādoñ ke ā.īne meñ ab ik ik chehra dhundlā hai

mizha pe ashk-e-alam jhilmilā.e āḳhir-e-shab
bichhaḌne vaale bahut yaad aa.e āḳhir-e-shab

vo terī yaad ke mehmān ho ga.e ruḳhsat
ujaḌ ga.ī mire dil kī sarā.e āḳhir-e-shab

ġhazal kā silsila thā yaad hogā
vo jo ik ḳhvāb sā thā yaad hogā

bahāreñ hī bahāreñ nāchtī thiiñ
hamārā bhī ḳhudā thā yaad hogā

samundar ke kināre sīpiyoñ se
kisī ne dil likhā thā yaad hogā

laboñ par chup sī rahtī hai hamesha
koī va.ada huā thā yaad hogā

tumhāre bhūlne ko yaad kar ke
koī rotā rahā thā yaad hogā

baġhal meñ the hamāre ghar to lekin
galī kā fāsla thā yaad hogā