Tags-Yaad

raat yuuñ dil meñ tirī khoī huī yaad aa.ī
jaise vīrāne meñ chupke se bahār aa jaa.e

yaad ke tyauhār meñ vasl-o-vafā sab chāhiye
raat ke resham meñ lipTī aap kī chhab chāhiye

mujhe bas itnī shikāyat hai marne vāloñ se
vo be-niyāz haiñ kyuuñ yaad karne vāloñ se

shikva āshiq-kushī kā farz na thā
yaad ye kyā unheñ dilā baiThe

āñsūo kuchh to ehtirām karo
ek arse meñ yaad aa.ī hai

aise lamhe bhī guzāre haiñ tirī furqat meñ
jab tirī yaad bhī is dil pe girāñ guzrī hai

aaj darvāze khule rahne do
yaad kī aag dahak uTThī hai

yaad ham aa na sake jashn-e-bahārāñ meñ use
ham-safar jis ne hameñ ahd-e-ḳhizāñ meñ rakkhā

aa gayā yaad unheñ apne kisī ġham kā hisāb
hañsne vāloñ ne mire ashk jo gin ke dekhe

har-chand tirī yaad junūñ-ḳhez bahut hai
maiñ jaag rahā huuñ ki havā tez bahut hai

yuuñ kah ke bhuul jaanā ye ḳhū aap hī kī hai
mujh ko vo yaad ahd bhī hai vo qasam bhī hai

yād-e-nigāh-e-mast se hai dil ko intishār
paimāna hai ḳharāb sharāb-e-chakīda kā

vahshat to nahīñ mujh ko ai 'josh' magar phir bhī
yaad aate haiñ rah rah kar chhoḌe hue vīrāne

manzil hai kaThin dil bahut ārām-talab hai
kyuuñ yaad mujhe aate ho ai bhūlne vaalo

tarīq yaad hai pahle se dil lagāne kā
usī kā maiñ bhī huuñ majnūñ thā jis gharāne kā

yaad thiiñ ham ko bhī rañgā-rañg bazm-ārā.īyāñ
lekin ab naqsh-o-nigār-e-tāq-e-nisyāñ ho ga.iiñ

vaañ gayā bhī maiñ to un kī gāliyoñ kā kyā javāb
yaad thiiñ jitnī duā.eñ sarf-e-darbāñ ho ga.iiñ

hai yaad tirī kyā kyā mā.il-ba-karam mujh par
guzre hue lamhoñ ko jo saath liye aa.ī

zarā der baiThe the tanhā.ī meñ
tirī yaad āñkheñ dukhāne lagī

kab yaad meñ terā saath nahīñ kab haat meñ terā haat nahīñ
sad-shukr ki apnī rātoñ meñ ab hijr kī koī raat nahīñ