Tags-Yaad

vo tirā ūñchī havelī ke qafas meñ rahnā
yaad aa.e to parindoñ ko rihā kartā huuñ

ġharaz ki kaaT diye zindagī ke din ai dost
vo terī yaad meñ hoñ yā tujhe bhulāne meñ

makīñ ko yaad hazīmat kī dāstāñ hai magar
to us ke ghar meñ haiñ ye jagmagāhaTeñ kaisī

kisī kī yaad meñ duniyā ko haiñ bhulā.e hue
zamāna guzrā hai apnā ḳhayāl aa.e hue

furqat kī aañch thī na tirī yaad kī tapish
dil sard paḌ rahā thā kahīñ ik sharar na thā

yād-e-ayyām ki sahrā-e-mohabbat meñ 'farāz'
jaras-e-qāfila-e-dil kī sadā zinda thī

maiñ to jal kar bujh chukā thā ik khañDar kī god meñ
vo na jaane kyuuñ mujhe hañstā huā yaad aa gayā

yaad ā.eñge zamāne ko misāloñ ke liye
jaise bosīda kitābeñ hoñ havāloñ ke liye

thāmnā mushkil dil-e-muztar ko shām-e-ġham huā
yaad aate hī kisī kī hashr kā aalam huā

ik yaad rah ga.ī hai magar vo bhī kam nahīñ
ik dard rah gayā hai so rakhnā sambhāl kar

tirī yaad meñ bahut hīla-jū yūñhī guzre shām-o-sahar mire
kabhī din meñ aah se kaam thā kabhī shab meñ nauhagarī rahī

mirī be-kasī se jahān meñ na huā bhī kuchh to bahut huā
vahī bebasī to rahī magar tirī yaad dil meñ basī rahī

ab jī ke bahalne kī hai ek yahī sūrat
biitī huī kuchh bāteñ ham yaad kareñ phir se

kahīñ ye apnī mohabbat kī intihā to nahīñ
bahut dinoñ se tirī yaad bhī nahīñ aa.ī

maiñ tasdīq karūñgā tere garm lahhū kī
tū bhī mujh ko yaad dilā ye zinda huuñ maiñ

haa.e ye lamha tirī yaad ke saath
koī rahmat kī ghaḌī ho jaise

aur phir yuuñ huā āñkhoñ ne lahu barsāyā
yaad aa.ī koī bārish meñ bitā.ī huī raat

sakūñ miltā hai un kī yaad kar ke
ilāj-e-tishnagī ḳhud tishnagī hai

mujhe is be-ḳhudī par bhī dil-e-marhūm ai 'jauhar'
bahut yaad aatā hai jab daur meñ paimāna aatā hai

dekhoge to aa.egī tumheñ apnī jafā yaad
ḳhāmosh jise pāoge ḳhāmosh na hogā