Tags-Yaad

mujhe yaad hai
rā.egānī ke gahre samundar meñ

raat bhar yād-e-guzishta ne satāyā mujh ko
raat bhar chashm-e-guhar-bār ne sone na diyā

dil meñ ik dard uThā āñkhoñ meñ aañsū bhar aa.e
baiThe baiThe hameñ kyā jāniye kyā yaad aayā

DhūñDoge agar mulkoñ mulkoñ milne ke nahīñ nāyāb haiñ ham
jo yaad na aa.e bhuul ke phir ai ham-nafaso vo ḳhvāb haiñ ham

shām-e-ġham yaad nahīñ sub.h-e-tarab yaad nahīñ
zindagī guzrī hai kis tarah ye ab yaad nahīñ

yaad hai utnā ki maiñ Duub gayā pastī meñ
kitnī ūñchī huī dīvār-e-adab yaad nahīñ

maiñ ne taḳhlīq kiye sher-o-suḳhan ke motī
merī taḳhlīq kā thā kaun sabab yaad nahīñ

jin ke jalvoñ se thā ābād jahān-e-dil-o-jāñ
merī nazroñ se nihāñ ho ga.e kab yaad nahīñ

aañkh meñ ashk haiñ ashkoñ meñ ġhamoñ kī talḳhī
kaise hote haiñ vo naġhmāt-e-tarab yaad nahīñ

itnā hī yaad hai muddat se ḳhafā haiñ vo 'zuhair'
un kī ḳhafagī kā magar koī sabab yaad nahīñ

jab tujhe yaad kar liyā sub.h mahak mahak uThī
jab tirā ġham jagā liyā raat machal machal ga.ī

shab kā ye haal hai ki tirī yaad ke sivā
dil ko kisī ḳhayāl se rāhat na ho sakī

dil ko ab ye bhī yaad ho ki na ho
kaun thā kyā malāl chhoḌ gayā

maiñ apnā kār-e-vafā āzmā.ūñgā phir bhī
kahāñ maiñ tere sitam yaad karne vaalā huuñ

umr bhar saath rahe yaad tirī dukh ho ki sukh
kyā samajhte the ise ham ye magar kyā niklī

us chashm-e-siyah kī yaad yaksar
shām-e-zulmāt ho ga.ī hai

dard vo aag ki bujhtī nahīñ jaltī bhī nahīñ
yaad vo zaḳhm ki bhartā nahīñ ristā bhī nahīñ

yaad meñ kis kī raat royā huuñ
ġharq-e-ḳhūñ hai hanūz jeb-o-kanār

mujhe taḌpā rahe haiñ yaad aa ke
vo lamhāt-e-hasīñ ahd-e-vafā ke

baḌhā tanhā.ī meñ ehsās-e-ġham āhista āhista
hameñ yaad aa.e sab ahl-e-karam āhista āhista