Tags-Yaad

aks-e-yād-e-yār ko dhundlā kiyā hai
maiñ ne ḳhud ko jaan kar tanhā kiyā hai

maiñ tujh ko yaad kartā huuñ ilāhī
tire bhī dil meñ hogī yaad merī

naza.a ke dam bhī unheñ hichkī na aa.egī kabhī
yūñhī gar bhūle raheñge vo 'saḳhī' kī yaad ko

yaad kā phuul mahakte hī navāh-e-shab meñ
koī ḳhushbū se mulāqāt ko chal paḌtā hai

rahte haiñ kasak ban ke tirī yaad ke jugnū
is dil se tirī yaad ke saa.e nahīñ jaate

aaj is andāz se aa.ī mujhe hichkī 'ājiz'
bhūlne vaale ne phir yaad kiyā ho jaise

jo ashk ban ke hamārī palak pe baiThā thā
tumheñ bhī yaad hai ab tak vo ḳhvāb kis kā thā

kyā hue āshufta-kārāñ kyā hue
yād-e-yārāñ yār-e-yārāñ kyā hue

yaad us kī ho ga.ī hai be-amāñ
yaad ke be-yādgārāñ kyā hue

mere lāshe par agar tashrīf bhī laa.e to hech
ba.ad mere un ko merī yaad bhī aa.ī to kyā

ik taraf tark-e-ta.alluq ik taraf hai us kī yaad
hai kahāñ āsāñ guzarnā aise tūfānoñ ke biich

ham ko yāroñ ne yaad bhī na rakhā
'jaun' yāroñ ke yaar the ham to

vo hijr thā ki añdherā sā chhā gayā dil meñ
vo yaad thī ki chamakne lage the jugnū se

zulf-e-siyah kī yaad meñ ḳhauf-e-pas-e-fanā kahāñ
tūl-e-shab-e-firāq ne sub.h kā ġham miTā diyā

dasht meñ shahr yaad aatā hai
ishq kā pahlā tajraba hai mujhe

ham un ke ġham meñ taḌap rahe haiñ jo ġhair se dil lagā chuke haiñ
hamāre dil meñ hai yaad un kī jo ham ko dil se bhulā chuke haiñ

jab bhī sach bolte bachchoñ pe nazar paḌtī hai
yaad aa jaatā hai be-sāḳhta bachpan apnā

bahr-e-hastī se kuuch hai darpesh
yaad mansūba-e-hubāb rahe

is taġhāful pe bhī allāh allāh
yaad aatā hai koī rah rah ke

but-parastī meñ bhī bhūlī na mujhe yād-e-ḳhudā
haath meñ sub.ha gale meñ mire zunnār rahā