Tags-Yaad

kuchh zarūr un meñ nasīhat thī magar yaad nahīñ
jo paḌhe the vo buzurgoñ ke maqūle likkhe

chāñd kī chāhat meñ tanhā tarsegī kaalī raat
yaad ke baasī phūloñ se mahkegī kaalī raat

terī yaad ko rokā mere dil ne dāman khīñch
ik duuje ke pahlū meñ bītegī kaalī raat

yaad haiñ ve din tujhe ham kaise āvāroñ meñ the
ḳhaar the har ābloñ meñ aable ḳhāroñ meñ the

mire rab chāñd pūnam kā zarā chauras hī kar de tū
golā.ī dekhtā huuñ maiñ to roTī yaad aatī hai

kisī ko yaad kar ke ek din ḳhalvat meñ royā thā
nahīñ mālūm kyuuñ jab se nadāmat baḌhtī jaatī hai

duur bhī jaate hue paas bhī aate hue ham
bhūlte bhūlte kuchh yaad dilāte hue ham

josh par apnī mastiyāñ aa.iiñ
yaad kis kī ye shoḳhiyāñ aa.iiñ

kahīñ un ko na yaad aayā huuñ
aaj kyuuñ mujh ko hichkiyāñ aa.iiñ

ruk rahā dam jo aa ke āñkhoñ meñ
yaad kis but kī añkhḌiyāñ aa.iiñ

phir lagāte ho mehñdī hāthoñ meñ
yaad phir rañg-reliyāñ aa.iiñ

kal se dil ko jo kal nahīñ paḌtī
yaad kis kī kalā.iyāñ aa.iiñ

apne jiine se ho ga.ī nafrat
yaad kis kī rukhā.iyāñ aa.iiñ

dil taḌapne lagā jo siine meñ
yaad kis but kī shoḳhiyāñ aa.iiñ

gar ho na ḳhafā to kah duuñ jī kī
is dam tumheñ yaad hai kisī kī

aap kī yaad aatī rahī raat bhar
chashm-e-nam muskurātī rahī raat bhar

ho e'timād us kā kise hai shīsha-bāzī yaad use
rakhtā hai shaad ik dam jise kartā hai phir andohgīñ

kabhī kabhī koī yaad
koī bahut purānī yaad

dekhā hilāl-e-īd to tum yaad aa ga.e
is mahviyat meñ iid hamārī guzar ga.ī

'bedam' us yaad ke maiñ sadqe us dard-e-mohabbat ke qurbāñ
jo jiinā bhī dushvār kare aur marnā bhī mushkil kar de