Tags-Yaad

badlī jo jagmagāte hue chāñd par paḌī
yaad aa ga.ī kisī kī badan se bharī qamīs

mar jā.eñge jab ham to bahut yaad karegī
jī bhar ke satā le shab-e-hijrāñ koī din aur

yaad se us kī nahīñ ḳhālī koī bhī lamha
phir bhī Dartā huuñ kahīñ bhuul na jā.ūñ us ko

ye kis kī yaad ye kis kā ḳhayāl aayā hai
mahak mahak hai tajallī kiran kiran ḳhushbū

vafā kī kaun sī manzil pe us ne chhoḌā thā
ki vo to yaad hameñ bhuul kar bhī aatā hai

ranj degī bāġh-e-rizvāñ kī tan-āsānī mujhe
yaad aa.egā tirā lutf-e-sitam-rānī mujhe

dīvālī
raghubir kī paak yaad kā unvāñ liye hue

chal base sū-e-adam tum ne bulāyā jin ko
yaad aa.ī to ġharīboñ kī qazā.eñ aa.iiñ

yuuñ tirī yaad meñ din raat magan rahtā huuñ
dil dhḌaknā tire qadmoñ kī sadā lagtā hai

ab maiñ āzād thā
aur tilismīñ paḌāv kā har ism bhī yaad thā

merī gustāḳhī na yaad aa.e ilāhī hargiz
un ko bekal na kare fikr-e-kamar aaj kī raat

yaar kī zulf-e-zar-afshāñ mujhe yaad aatī hai
kyā hī siine se nikalte haiñ sharar aaj kī raat

haj meñ jab yaad aa.iiñ vo āñkheñ
tāq-e-haram par rakh dī tauba

ek aañsū yaad kā Tapkā to dariyā ban gayā
zindagī bhar mujh meñ ek tūfān sā paltā rahā

raam ban-bās se jab lauT ke ghar meñ aa.e
yaad jañgal bahut aayā jo nagar meñ aa.e

kahāñ aa ke rukne the rāste kahāñ moḌ thā use bhuul jā
vo jo mil gayā use yaad rakh jo nahīñ milā use bhuul jā

sukūt-e-āḳhir-e-shab aur fasurdagī dil kī
bujhā bujhā sā tirī yaad kā diyā niklā

ye yaad rahe ham bhī nahīñ yaad kareñge
gar tū ne hameñ dil se bhulāyā to huā kyā

kis muñh se kareñ un ke taġhāful kī shikāyat
ḳhud ham ko mohabbat kā sabaq yaad nahīñ hai