Tags-Yaad

ḳhushbū kī rifāqat kā nasha TuuT rahā hai
lekin vo safar dād-talab yaad hai mujh ko

ab shaam ke hāthoñ jo giraftār hai sūraj
dopahar meñ thā qahr-o-ġhazab yaad hai mujh ko

aivān mirī ruuh ke raushan kiye jis ne
vo shoḳhi-e-yak-jumbish-e-lab yaad hai mujh ko

kuchh din se muqayyad huuñ maiñ vīrāna-e-jāñ meñ
hālāñki koī shahr-e-tarab yaad hai mujh ko

kyuuñ yaad dilāte ho mujhe chāñdnī rāteñ
paimān-e-vafā tum se hai sab yaad hai mujh ko

vo shaḳhs 'ḳhayāl' aaj jo rū-posh hai mujh meñ
the us meñ kamālāt ajab yaad hai mujh ko

baḌhī huī hai 'sabā' aaj us kī yaad kī lau
chamak uThī hai mire dil meñ phir bujhī huī aas

terī yaad meñ rote rote shab bhar jaagā lekin phir
hichkī sun ke kachchī niiñd meñ soyā bistar chauñk paḌā

yād-e-ayyāme ki thā zoroñ pe jazb-e-husn-o-ishq
vo mire dil kā taḌapnā be-qarārī aap kī

yaad rahtā thā nigāhoñ ko har ik ḳhvāb magar
zehn har ḳhvāb kī tābīr bhulā detā thā

vaqt-e-ruḳhsat nishānī jo talab kī to kahā
daaġh kaafī hai judā.ī kā agar yaad rahe

itnī to aarzū hai kabhī yaad kar leñ dost
shāyad kabhī phir aa.e zamāna bahār kā

jī chalā thā ki tire hoñT mujhe yaad aa.e
la.al paa.eñ haiñ maiñ is jī hī ke khote khote

'zafar' aadmī us ko na jāniyegā vo ho kaisā hī sāhab-e-fahm-o-zakā
jise aish meñ yād-e-ḳhudā na rahī jise taish meñ ḳhauf-e-ḳhudā na rahā

bhuul gayā huuñ sab kuchh 'sālim' mujh ko kuchh bhī yaad nahīñ
yādoñ ke ā.īne meñ ab ik ik chehra dhundlā hai

tire qarīb bhī yaad aa rahe haiñ kār-e-jahāñ
bahut qalaq hai ki fursat se maiñ nahīñ aayā

ik aur girah saañs kī Dorī meñ paḌegī
yaad aayā mujhe bhūlā huā pyaar kā rishta

kyuuñ yaad dilāte ho 'rashīd' un ko ye bandhan
ab kaun nibhātā hai ye bekār kā rishta

tevar chaḌhā ke pūchh rahe haiñ vo hāl-e-dil
rūdād-e-ġham to yaad hai lekin sunā.e kaun

yaad har pal tujh ko karne kā sila paane lagā
mujh ko ā.īna terā chehra hī dikhlāne lagā