Tags-Yaad

jo ziist ke tapte sahrā par bhūle se kabhī barsā bhī nahīñ
har moḌ pe har ik manzil par phir kyuuñ vahī bādal yaad aayā

ham zūd-farāmoshī ke liye badnām bahut haiñ phir bhī 'bashar'
jab jab bhī chalī madmātī pavan uḌtā huā āñchal yaad aayā

sunā hai tujh ko to ham yaad bhī nahīñ aate
ye imtihāñ to nahīñ ye to āzmānā huā

chāragar bhī na kyā kareñge yaad
kar sakeñ jis qadar ilaaj kareñ

tum ko bhulā rahī thī ki tum yaad aa ga.e
maiñ zahr khā rahī thī ki tum yaad ga.e

aaj kyā lauTte lamhāt mayassar aa.e
yaad tum apnī ināyāt se baḌh kar aa.e

yaad thā 'suqrāt' kā qissa sabhī ko 'ehtirām'
sochiye aise meñ baḌh kar sach ko sach kahtā to kaun

kisī kī yaad ko apnā shi.ār kar leñge
fazā-e-dahr ko ham sāzgār kar leñge

roz-e-raushan sī shab-e-tār huī āñkhoñ meñ
jis ghaḌī yaad tirā gesū-e-ḳhamdār aayā

na chhūTe kufr meñ bhī vaz-e-īmāñ
ki har hālat meñ hai yād-e-ḳhudā farz

yaad aa.ī jab tumhāre ruup raushan kī chamak
maiñ sarāsar sūrat-e-ā.īna hairāñ rah gayā

yaad rakhnā dosto is bazm meñ
aa ke 'shiblī' bhī ġhazal-ḳhvāñ rah gayā

phirā kiye haiñ chahl saal dasht-e-vahshat meñ
kisī ko yaad tirā rahguzar nahīñ aayā

bahut jatāyā kisī ne ki saath saath thā vo
hameñ to yaad koī ham-safar nahīñ aayā

nahīñ ki yaad patā us ko mere ghar kā na thā
tamām shahr meñ ghūmā idhar nahīñ aayā

le ke jaate na agar saath vo yādeñ apnī
yaad karte unheñ aur vaqt guzārā karte

nahīñ bholā hai junūñ meñ vo havās uḌ jaanā
yaad hai barhamī-e-sohbat-e-ahbāb mujhe

dil se kartā huuñ laakh laakh savāl
yaad aatā hai jab javāb tirā

qumrī usī kī yaad meñ kū-kū kare hai yaar
bulbul usī ke shauq meñ kartī hai chahchahā

gar ḳhanda yaad aa.e to siine ko chaak kar
gar ġhamza yaad aa.e to zaḳhm-e-sināñ uThā