Tags-Yaad

niklegā chāñd unhīñ andheroñ se
un se milne kī raat yaad karo

chhoḌo jaane do jo huā so huā
aaj kyuuñ kal kī baat yaad karo

karnā hai shā.irī agar 'naushād'
'mīr' kā kulliyāt yaad karo

āñkhoñ pe hai ik manzar-e-kam-dīda kā parda
maiñ kab se tirī yaad ke zindāñ meñ paḌā huuñ

maiñ kahīñ jā.ūñ mere ham-rah us kī yaad hai
tum mujhe tanhā samajhte ho to maiñ tanhā nahīñ

hāl-e-dil ham bhī sunāte lekin
jab vo ruḳhsat huā tab yaad aayā

yuuñ to un kī yaad se miltī hai taskīn-e-hayāt
aur jab taḌpā.e hai zālim bahut taḌpā.e hai

mujh ko yaad rahā tū bhūlā
baat hai ye to aadat kī

kisī badmast kī yaad aa ga.iiñ āñkheñ saaqī
jab chhalaktā huā aage mire miinā aayā

tumhārī yaad ke jab zaḳhm bharne lagte haiñ
kisī bahāne tumheñ yaad karne lagte haiñ

jo ghaḌī yaad meñ tirī kaT jaa.e
vo hī āThoñ pahar kī pūñjī hai

hameñ thī kaun sī sajde kī aarzū tum se
magar duā meñ kabhī ham ko yaad karnā thā

ab dil meñ terī yaad kī ik sham.a tak nahīñ
tārīk rāstoñ se guzarne lagā huuñ maiñ

'amīr' ab hichkiyāñ aane lagī haiñ
kahīñ maiñ yaad farmāyā gayā huuñ

'sājid' tū phir se ḳhāna-e-dil meñ talāsh kar
mumkin hai koī yaad purānī nikal paḌe

ek do ashk bahātī hai chalī jaatī hai
ab tirī yaad bhī aatī hai chalī jaatī hai

unke dil jab hoñge yād-e-ma.asiyat se paash paash
tere ruḳh par ek bhī hogī na maazī kī ḳharāsh

jab chhā.ī ghaTā lahrā.ī dhanak ik husn-e-mukammal yaad aayā
un hāthoñ kī mehñdī yaad aa.ī un āñkhoñ kā kājal yaad aayā

sau tarah se ḳhud ko bahlā kar ham jis ko bhulā.e baiThe the
kal raat achānak jaane kyuuñ vo ham ko musalsal yaad aayā

tanhā.ī ke saa.e bazm meñ bhī pahlū se judā jab ho na sake
jo umr kisī ke saath kaTī us umr kā pal pal yaad aayā