Tags-Yaad

hai dilātī yaad mai-noshī fazā barsāt kī
dil baḌhā jaatī hai aa aa kar ghaTā barsāt kī

ik fasāna hai jo kuchh yaad rahā kuchh na rahā
mere dāman meñ na kaliyāñ haiñ na kāñTe na ġhubār

yaad aa ga.ī jo ka.abe meñ aabrū kī ai 'vahīd'
apnī namāz-e-ishq adā aur ho ga.ī

maiñ vo huuñ jis kā zamāne ne sabaq yaad kiyā
ġham ne shāgird kiyā phir mujhe ustād kiyā

husn-e-jāñ-soz ne vahdat meñ mujhe yaad kiyā
maiñ ye samjhā ki mujhe ishq ne barbād kiyā

jis jagah khaa.ī thī Thokar vahīñ turbat thī mirī
bhūlne vaale ne mushkil se mujhe yaad kiyā

tujh ko sab dete haiñ āvāz vo apne hoñ ki ġhair
is taraf maiñ ne mo.azzin ne udhar yaad kiyā

nā-tavānī meñ gire the jo lahū ke qatre
maiñ to bhūlā huā thā dil ne bahut yaad kiyā

qabl-az-vaqt phañsā daam meñ aur phañste hī
jo tamannā yahāñ laa.ī thī use yaad kiyā

dāman-e-dil ko thaam letī hai
kitnī gustāḳh hai tumhārī yaad

dil-e-barbād pe hai sāya-fagan yaad tirī
sāya-e-fazl-e-ḳhudā jaise gunahgār ke saath

marte marte ham ko ik bechainī sī thī
ek purānā dushman thā jo yaad aayā thā

mire āñsuoñ ne kahā na thā ki bichhaḌ ke phir na mileñge ham
tujhe yaad ho ki na yaad ho vo nigāh-e-bāz-pasīñ mirī

bas ab to yaad se hī zindagī ibārat hai
kahāñ kā va.ada ki milne kī aarzū bhī nahīñ

gale se lagte hī jitne gile the bhuul ga.e
vagarna yaad thiiñ ham ko shikāyateñ kyā kyā

yuuñ dabe paañv yaad aatī hai
le ke dil kā qarār jaatī hai

kisī kī vo zulfeñ jo yaad aa ga.iiñ
mire siine par saañp lahrā ga.e

yuuñ taras khā ke na pūchho ahvāl
tiir siine pe lagā ho jaise

aa.ī jo terī yaad to āñkheñ baras paḌīñ
is vaqt tere dard kā dil par nuzūl hai

ik dūsre ke vāste donoñ bane 'vasī'
gul-dān merā dil hai tirī yaad phuul hai