Tags-Yaad

ham ne kaaTī haiñ tirī yaad meñ rāteñ aksar
dil se guzrī haiñ sitāroñ kī barāteñ aksar

shām-e-hijrāñ bhī ik qayāmat thī
aap aa.e to mujh ko yaad aayā

phir uThā yaad ke āñgan se udāsī kā dhuāñ
kis ne tāqoñ meñ jalā kar mirī shāmeñ rakh diiñ

haa.e ik shaḳhs jise ham ne bhulāyā bhī nahīñ
yaad aane kī tarah yaad vo aayā bhī nahīñ

aatā hai dāġh-e-hasrat-e-dil kā shumār yaad
mujh se mire gunah kā hisāb ai ḳhudā na maañg

hairāñ zamīñ ke nuur se hai charḳh-e-lājvard
mānind-e-kahrubā hai ruḳh-e-āftāb-e-zard

ishq ko husn ke atvār se kyā nisbat hai
vo hameñ bhuul ga.e ham to unheñ yaad kareñ

be-sudh sā rahtā huuñ maiñ kyuuñ bhuul gayā apnoñ ġhairoñ ko
ik bas un kī yaad bachī hai pahlī baar mohabbat kī hai

ab bhī yārān-e-girafta-dil ko
yaad hai anjuman-ārā.ī mirī

ab tak haiñ yaad mujh ko vo paiham tajalliyāñ
kitnā nazar-navāz thā har manzar-e-hijāz

maiñ huuñ paikān-e-dard ai 'ḳhurshīd'
aur ik yaad kī kamān meñ huuñ

aa ga.ī kyā kisī kī yaad 'jalīl'
chalte chalte jigar ko thaam liyā

mujhe vo ahd vo din-rāt yaad aate haiñ
ki jab na thī tire ġham se koī shanāsā.ī

shaam paḌte hī kisī shaḳhs kī yaad
kūcha-e-jāñ meñ sadā kartī hai

ġham-e-āshiqī ho tirā bhalā tujhe yaad rakkhūñgā maiñ sadā
isī ek nām-e-vafā pe bas mujhe baar baar chhalā gayā

abhī sahīfa-e-jāñ par raqam bhī kyā hogā
abhī to yaad bhī be-sāḳhta nahīñ aa.ī

judā.ī kī ghaḌī sar par khaḌī hai
ham us kī yaad hone jā rahe haiñ

aap kī yaad meñ ham ai sanam-e-ġhaflat-kesh
aise baiThe ki qayāmat hī uThā ke uTThe

chāñdnī se sahāb-pāroñ se
jī bahaltā hai yādgāroñ se

rahrav-e-manzil-e-hastī huuñ maiñ ai yād-e-habīb
dhuup meñ mere liye sāya-e-dīvār na ban