Tags-Yaad

sajde hī yaad haiñ na tire sañg-e-dar kā hosh
sar bhī jhukā ke duur rahe āstāñ se ham

tirī yaad meñ huā jab se gum tire gum-shuda kā ye haal hai
ki na duur hai na qarīb hai na firāq hai na visāl hai

vo ḳhushī nahīñ hai vo dil nahīñ magar un kā saaya sā ham-nashīñ
faqat ek ġham-zada yaad hai faqat ik fasurda ḳhayāl hai

mujhe bhī yaad ke jugnū pukārte haiñ 'faiz'
añdherī raat meñ aksar kisī kā naam liye

yādash-ba-ḳhair yaad haiñ dil kī musībateñ
pahlū meñ ik sitam-zada-e-rozgār thā

aaj sūkhe phuul jab ham ko kitāboñ meñ mile
sochne par yaad aayā bāġhbāñ kā khel hai

paḌosī kā bhī haq hai tujh pe itnā yaad rakh 'mohsin'
muñDeroñ par charāġhoñ ko salīqe se rakhā jaa.e

hālāt ke tilism ne pathrā diyā magar
biite samoñ kī yaad meñ khoyā na tū na maiñ

vo tirā ūñchī havelī ke qafas meñ rahnā
yaad aa.e to parindoñ ko rihā kartā huuñ

bār-hā aisā huā hai yaad tak dil meñ na thī
bār-hā mastī meñ lab par un kā naam aa hī gayā

qurbāñ huuñ mujhe jis dam yaad aatī haiñ vo bāteñ
kyā din vo mubārak the kyā ḳhuub thiiñ vo rāteñ

us roz miyāñ mil kar nazroñ ko churāte the
tujh yaad meñ hī sājan karte haiñ madārāteñ

kabhī kitāboñ meñ phuul rakhnā kabhī daraḳhtoñ pe naam likhnā
hameñ bhī hai yaad aaj tak vo nazar se harf-e-salām likhnā

karūñ na yaad magar kis tarah bhulā.ūñ use
ġhazal bahāna karūñ aur gungunā.ūñ use

magar vo zūd-farāmosh zūd-ranj bhī hai
ki ruuTh jaa.e agar yaad kuchh dilā.ūñ use

jo ham-safar sar-e-manzil bichhaḌ rahā hai 'farāz'
ajab nahīñ hai agar yaad bhī na aa.uuñ use

yaad bhī terī ik āzār-e-musalsal hai magar
apne siine se lagā.e hue baiThā hai koī

jo hamāre hue na apne 'yād'
aise logoñ ko yaad kyā rakhiye

kahā ho kuchh kabhī mujh se to ai chāragaro jānūñ
maiñ kyā kah duuñ dil-e-bīmār kis ko yaad kartā hai

apnā kiina banūñ ki yād-e-raqīb
kis tarah us ke dil meñ jā kiije