Tags-Yaad

numū kā tūfāñ thā āfrīnash kī zad pe ham tum khaḌe the donoñ
tumheñ bhī kuchh yaad aa.e shāyad mujhe to aatā hai dhyān sā kuchh

dil-e-betāb hai taḌpā kyā kyā
jab kabhī yaad vo sūrat aa.ī

vafā kareñge nibāheñge baat māneñge
tumheñ bhī yaad hai kuchh ye kalām kis kā thā

yaad mausam vo purāne aa.e
zaḳhm hañsne ke zamāne aa.e

kah ga.e baat jo sach thī varna
yaad kitne hī bahāne aa.e

yaad rakh dahr kī dīvār ke ha.Tne par hī
dekh saktī hai koī aañkh ḳhudā kī sūrat

bas un kī yaad ke ham paañv chuum lete haiñ
hameñ ḳhabar nahīñ merāj-e-bandagī kyā hai

yaad ban kar tirī ma.asūm vafā ne zālim
dil pe vo naqsh biThāyā hai ki jī jāntā hai

jab kabhī yaad dilāyā hai taḳhayyul ne tumheñ
is tarah yaad dilāyā hai ki jī jāntā hai

shab-e-firāq meñ mire vo bāl-o-par katar gayā
parind us kī yaad kā na.ī uḌaan bhar gayā

aao kuchh der kareñ pahle-pahal kī bāteñ
yaad is pyaar kī vo rasm purānī to rahe

hasīnoñ kī mohabbat kā na kar kuchh e'tibār ai dil
ye zālim kis ke hote haiñ ye kis ko yaad karte haiñ

vo jo ham meñ tum meñ qarār thā tumheñ yaad ho ki na yaad ho
vahī yaanī va.ada nibāh kā tumheñ yaad ho ki na yaad ho

bas ek baar yaad ne tumhārā saath chhū liyā
phir is ke ba.ad to ka.ī jamāl jāgte rahe

gar yaad meñ saaqī kī sāġhar nazar aa jaa.e
paimāna-e-dil chhalke muñh ko jigar aa jaa.e

ai dil-e-nādāñ kisī kā rūThnā mat yaad kar
aan Tapkegā koī aañsū bhī is jhagḌe ke biich

zikr mirā aur tere lab par yaad mirī aur tere dil meñ
jhūTī aas dilāne vaale aag na bhaḌkā mere dil meñ

chhā ga.e hoñge yaad ke bādal
khul ke barsāt ho ga.ī hogī

hijr-e-hiddat meñ yaad kī ḳhushbū
ek pañkhā sā jhal ga.ī hogī

aa.ī thī mauj-e-sabz-e-bād-e-shimāl
yaad kī shāḳh phal ga.ī hogī