Tags-Yaad

aa ga.e jab yaad kuchh us rabt bāham ke maze
dil bhar aayā dīda-e-tar ashk barsāne lage

ye jabr-e-vaqt hai kaisā ki us kī yaad ke chāñd
ugeñ to phir sar-e-shāḳh-e-malāl jalte raheñ

ufuq ke paar mujhe yaad kar rahā hai koī
abhī milā hai udhar se payām-e-ishq ba-ḳhair

us shahr meñ kitne chehre the kuchh yaad nahīñ sab bhuul ga.e
ik shaḳhs kitāboñ jaisā thā vo shaḳhs zabānī yaad huā

hashr meñ husn se 'ravish' shikva-e-rū-ba-rū ġhalat
roz-e-azal kī baat hai aaj hī yaad aa.e kyuuñ

ek mīThī sī kasak jaag uThī hai man meñ
yaad phir se mujhe ik ḳhvāb purānā aayā

qatl hue haiñ ab tak kitne
kū-e-sitam ko yaad nahīñ hai

ma.ashūq kaun sā hai na ho dil meñ jis kī yaad
is muḳhtasar se baaġh meñ kis gul kī bū nahīñ

ye dam-e-sard hai kis kā ki har ik naḳhl-ba-bāġh
yād-e-be-bargi-e-ayyām-e-ḳhizāñ detā hai

duur kisī ko yaad aatā huuñ raat mujhe pāgal kartī hai
ghar se duur nikal jaatā huuñ raat mujhe pāgal kartī hai

'pāshī' dil ko chain na aa.e ghereñ un kī yaad ke saa.e
raat aa.e to ghabrātā huuñ raat mujhe pāgal kartī hai

tārīk thī ye raat magar yaad kī kiran
aa.ī to nūr-e-husn kā darvāza phir khulā

na bhūle se yaad ab kare koī us ko
mirā yaad karnā bhī jis ne bhulāyā

akelā pā ke mujh ko yaad un kī aa to jaatī hai
magar phir lauT kar jaatī nahīñ maiñ kaise so jā.ūñ

kyā kyā sitam zamāne ke maiñ sah gayā 'anīs'
marne ke ba.ad yaad karoge miyāñ mujhe

ḳhud ko yaad aane lage ham 'bāqī'
phir kisī baat pe jhagḌā hogā

thakan kā ehsās ho to kar lenā yaad us ko
adhūre ḳhvāboñ kī sar-phirī kā.enāt likhnā

vo tirā ahd-e-vafā yaad hai ab tak 'mītā'
bhuul baiThī huuñ mohabbat kā zamāna kab thā

bahut dinoñ se idhar us ko yaad bhī na kiyā
bahut dinoñ se udhar kā ḳhayāl kyuuñ aayā

chashm-e-mūsā hama-tan ban gayā maiñ hairat se
dekhā ik but kā vo aalam ki ḳhudā yaad aayā