Tags-Yaad

hamesha aap kā har hukm sar ā.ankhoñ pe rakhte haiñ
magar ye yaad rakhiyegā ki man-mānī bhī karte haiñ

chhoTā huuñ is liye mujhe ehsāñ haiñ sab ke yaad
mohsin ko bhuul jā.ūñ maiñ itnā baḌā nahīñ

maiñ tujh ko yaad aa.uuñ aur aa.uuñ tamām-umr
ai dost maiñ burā huuñ par itnā burā nahīñ

kyā shai thī kisī kī pahlī nazar kuchh is ke alāva yaad nahīñ
ik tiir sā dil meñ jaise lagā paivast huā aur TuuT gayā

le mol mire dil kā vo jab sāġhar-e-nāzuk
yaad aave na kaash us ko sifālī kā bajānā

suntā huuñ kisī poch kī jab daf-zanī-e-fikr
aatā hai mujhe yaad Dafālī kā bajānā

jab yaad aayā terā mahaktā badan mujhe
bahlā sakī na bū-e-gul-o-yāsman mujhe

kis ke ruḳhsār dam-e-sair-e-chaman yaad aa.e
phuul āñkhoñ meñ khaTakne lage kāñTā ho kar

ab yaad nahīñ mujh ko 'farāz' apnā bhī paikar
jis roz se bikhrā huuñ simaT kar nahīñ dekhā

goyā tumhārī yaad hī merā ilaaj hai
hotā hai pahroñ zikr tumhārā tabīb se

dil un kī yaad se jo bahaltā chalā gayā
ġham aap apnī aag meñ jaltā chalā gayā

ye jaan kar ki ġham hai tirī yaad kā sabab
maiñ har ḳhushī ko ġham se badaltā chalā gayā

bajā irshād farmāyā gayā hai
ki mujh ko yaad farmāyā gayā hai

ye ashk dhundlā rahe haiñ paiham miTā rahe haiñ
nigāh meñ yaad kī kahānī ravāñ hai paanī

yād-e-jānāñ utar ke aa.ī hai
shab ke ziine se chāñdnī kī tarah

yaad aatā hai roz o shab koī
ham se rūThā hai be-sabab koī

yaad aatī haiñ duur kī bāteñ
pyaar se dekhtā hai jab koī

koī purānā ḳhat kuchh bhūlī-bisrī yaad
zaḳhmoñ par vo lamhe marham hote haiñ

us mah ke jalve se kuchh tā 'mīr' yaad deve
ab ke gharoñ meñ ham ne sab chāñdnī hai boī

tujh ko bhī kyuuñ yaad rakhā
soch ke ab pachhtāte haiñ