Tags-Yaad

rag-e-gul par hai kabhī aur kabhī ġhunche pe nigāh
baaġh meñ kis kī kamar kis kā dahan yaad aayā

safar-e-mulk-e-adam kī huī aisī ujlat
zād-e-rah kuchh na ba-juz gor-o-kafan yaad aayā

sohbat-e-lāla-ruḳhāñ ahd-e-shabāb-o-shab-e-vasl
mai-e-kohna jo milī dāġh-e-kuhan yaad aayā

jab se aayā hai nazar ye tirā husn-e-be-dāġh
kabk ko maah na bulbul ko chaman yaad aayā

tere saudā.ī ko phir josh huā vahshat kā
qaidī-e-zulf ko phir tauq-o-rasan yaad aayā

paan khā kar jo ugaal aap ne thūkā sāhab
jauharī mahv hue la.al-e-yaman yaad aayā

ba.ad muddat ke talab aap ne bande ko kiyā
shukr-sad-shukr maiñ ai mushfiq-e-man yaad aayā

fasl-e-gul aate hī 'āġhā' ne bhī vahshat kī lī
kaisī ye chaal chalā kis kā chalan yaad aayā

haañ kaif-e-be-ḳhudī kī vo saa.at bhī yaad hai
mahsūs kar rahā thā ḳhudā ho gayā huuñ maiñ

laakh koshish karo aa ke jaatī nahīñ
yaad ik bin bulā.ī sī mehmān hai

tirī yaad kī barf-bārī kā mausam
sulagtā rahā dil ke andar akele

vahī kārvāñ vahī qāfila tumheñ yaad ho ki na yaad ho
vahī manzil aur vahī marhala tumheñ yaad ho ki na yaad ho

mutafā.ilun mutafā.ilun mutafā.ilun mutafā.ilun
ise vazn kahte haiñ sher kā tumheñ yaad ho ki na yaad ho

vahī shukr hai jo sipās hai vo malūl hai jo udaas hai
jise shikva kahte ho hai gila tumheñ yaad ho ki na yaad ho

vahī naqs hai vahī khoT hai vahī zarb hai vahī choT hai
vahī suud hai vahī fā.eda tumheñ yaad ho ki na yaad ho

vahī hai nadī vahī nahr hai vahī mauj hai vahī lahr hai
ye habāb hai vahī bulbula tumheñ yaad ho ki na yaad ho

vahī kizb hai vahī jhuuT hai vahī jur.a hai vahī ghūñT hai
vahī josh hai vahī valvala tumheñ yaad ho ki na yaad ho

vahī sāthī hai jo rafīq hai vahī yaar hai jo sadīq hai
vahī mehr hai vahī māmtā tumheñ yaad ho ki na yaad ho

jise bhed kahte ho raaz hai jise baajā kahte ho saaz hai
jise taan kahte ho hai navā tumheñ yaad ho ki na yaad ho

jo murād hai vahī mudda.ā vahī muttaqī vahī pārsā
jo phañse balā meñ vo mubtalā tumheñ yaad ho ki na yaad ho