Tags-Yaad

maiñ us ko yaad jab karūñ ġhazal ke diip jal uTheñ
nisār is ḳhayāl par ki lafz bhī ġhulām haiñ

mahshar meñ paas kyuuñ dam-e-fariyād aa gayā
rahm us ne kab kiyā thā ki ab yaad aa gayā

zikr-e-sharāb-o-hūr kalām-e-ḳhudā meñ dekh
'momin' maiñ kyā kahūñ mujhe kyā yaad aa gayā

Thiik hai ujlī yaad kā rishta apne dil se TuuTā bhī
dariyā dariyā aag ugaltā lekin tum ne dekhā bhī

mausam mausam yaad meñ terī tanhā ham ne kaaT diye
ik lamhe ke mel kā rishta sach hai koī rishta bhī

us ne phir yaad kiyā hai shāyad
dil dhaḌakne kī sadā aa.ī hai

yād-e-ayyām ki ham-rutba-e-rizvāñ ham the
bāġhbān-e-chaman-e-mahfil-e-jānāñ ham the

tauq minnat ke gale meñ the vo din yaad karo
tum par us ahd meñ bhī chāk-garebāñ ham the

yaad aur ġham kī rivāyāt se niklā huā hai
dil jo is vaqt mire haat se niklā huā hai

ye but-kada hai idhar aa.iye zarā 'bismil'
butoñ kī yaad meñ bande ḳhudā ke baiThe haiñ

'zafar' aadmī us ko na jāniyegā vo ho kaisā hī sāhab-e-fahm-o-zakā
jise aish meñ yād-e-ḳhudā na rahī jise taish meñ ḳhauf-e-ḳhudā na rahā

ghar kī jab yaad sadā de to palaT kar aa jaa.eñ
kaash ham apnī hī ḳhvāhish ko mayassar aa jaa.eñ

kab yaad kiyā ham ko 'hafīz' ahl-e-chaman ne
jab ziist sū-e-vādi-e-pur-ḳhār chalī hai

aayā na haman paas kiyā va.ada-ḳhilāfī
'fā.ez' kā kuchh ahvāl magar yaad na aayā

ab tak hai koī baat mujhe yaad harf harf
ab tak maiñ chun rahā huuñ kisī guftugū ke phuul

aaj terī yaad se Takrā ke TukḌe ho gayā
vo jo sadiyoñ se luḌhaktā ek patthar mujh meñ thā

magar hote na jo ik yaad ke jugnū
asāsa hast-e-shab kā kyā yahāñ hotā

yaad aate rahe be-tarah mo.attar gesū
aaj bechain bahut bād-e-sabā ne rakkhā

kisī sūrat to dil ko shaad karnā
hameñ dushman samajh kar yaad karnā