Tags-Yaad

armānoñ kī nāzuk mālā.eñ pahnānā shāmoñ ko
yaad pavan ke saath hī bahnā terī merī aadat hai

jo tirī yaad ke kiiḌe haiñ badan ke andar
vo mirī ruuh ko khāte haiñ plus piite haiñ

samā kar dil meñ nazroñ se nihāñ hai
mujhe yaad aane vaale tū kahāñ hai

lahrātā hai āñkhoñ meñ kisī yaad kā manzar
be-vaj.h bhī ho jaatī hai barsāt safar meñ

yahī ik shaġhl rakhnā hai aziyyat ke dinoñ meñ bhī
kisī ko bhuul jaanā hai kisī ko yaad karnā hai

ye kyā jabr-e-mashiyat hai ye kyā jabr-e-sadāqat hai
ki jis ko ham bhulānā chāhte haiñ yaad aatā hai

zikr-e-ilm-o-adab na chheḌ 'anjum'
hazrat-e-'fauq' yaad aate haiñ

sahrā meñ ThanDe vaqt hameñ yaad aa.ī jo us kī jalvagarī
kuchh aisī huī vahshat dil ko dam jā ke zer-e-bām liyā

aa.ī jab un kī yaad to aatī chalī ga.ī
har naqsh-e-mā-sivā ko miTātī chalī ga.ī

pahuñch sake na kisī ḳhush-gavār manzil tak
tumhārī yaad kī zanjīr-e-pā se laḌte hue

vo tirī yaad ke aañsū the jo bahne na diye
chashm vīrāñ meñ ruke shahr-badar hone tak

ham tumheñ yaad karte ro lete
do-ghaḌī miltā jo sukūñ sāhab

maiñ tez dhuup meñ jal kar bhī yaad kartā huuñ
vo sard raat meñ us kā lihāf ho jaanā

naale 'beḳhud' ke qayāmat haiñ tujhe yaad rahe
zulm karnā hai to patthar kā jigar paidā kar

raat din rahne lagī us sitam-ījād kī yaad
'hasrat' ab dekhiye anjām hamārā kyā ho

kyā karoge 'nizām' rātoñ meñ
zaḳhm kī yaad ne agar chhoḌā

ye kis maqām pe pahuñchā diyā mohabbat ne
ki terī yaad bhī ab koshishoñ se aatī hai

maiñ jaatā huuñ dil ko tire paas chhoḌe
mirī yaad tujh ko dilātā rahegā

mayassar tujhe har ḳhushī hogī lekin
mujhe yaad kar ke tū royā karegā

kisī manzil kī yaad aate hī
chalne lagtā hai naqsh-e-pā merā