Tags-Yaad

tumhārī mahfil se jā rahā huuñ mujhe duāoñ meñ yaad rakhnā
ai mere yaaro lo maiñ chalā huuñ mujhe duāoñ meñ yaad rakhnā

mohabbatoñ kā maiñ rāsta huuñ mujhe duāoñ meñ yaad rakhnā
jo tum na dekho maiñ dekhtā huuñ mujhe duāoñ meñ yaad rakhnā

rah-e-vafā meñ fanā huā par kisī ke aage jhukā nahīñ jo
vafāoñ kā maiñ vo qāfila huuñ mujhe duāoñ meñ yaad rakhnā

mujhe yaqīñ hai ye mere hote zamāna saarā tyaag deñge
maiñ apne yāroñ kā hausla huuñ mujhe duāoñ meñ yaad rakhnā

na manziloñ kī ḳhabar hai mujh ko na rāstoñ kā patā hai phir bhī
maiñ apne ghar se to chal paḌā huuñ mujhe duāoñ meñ yaad rakhnā

maiñ thak ke saa.e meñ jab huuñ baiThā to saare saa.e lage haiñ chalne
maiñ bad-nasībī kī intihā huuñ mujhe duāoñ meñ yaad rakhnā

mujhe ḳhudā ne basāratoñ kī hadoñ se zyāda basārteñ diiñ
maiñ band āñkhoñ se dekhtā huuñ mujhe duāoñ meñ yaad rakhnā

ġhamoñ meñ mere ḳhushī chhupī hai ḳhushī meñ merī chhupe hue ġham
ajab laḌā.ī maiñ laḌ rahā huuñ mujhe duāoñ meñ yaad rakhnā

mohabbatoñ ke sarāb jhele rafāqatoñ ke azaab jhele
kisī kī yādoñ meñ ro rahā huuñ mujhe duāoñ meñ yaad rakhnā

nahīñ hai jis kā hal ab to koī 'nadīm' bas ik sivā tumhāre
maiñ ek aisā hī mas.ala huuñ mujhe duāoñ meñ yaad rakhnā

'nadīm' chāhat ye kam na hogī ḳhudā karegā ki phir mileñge
ye jaate jaate maiñ kah rahā huuñ mujhe duāoñ meñ yaad rakhnā

jhoñkoñ kī nazr hai chaman-e-intizār-e-dost
yād-e-ummīd-o-bīm kī ye sansanāhaTeñ

ruḳhsār-e-tar se taaza ho bāġh-e-adan kī yaad
aur us kī pahlī sub.h kī vo rasmasāhaTeñ

tamām umr kise kaun yaad rakhtā hai
ye jānte haiñ magar hausla baḌhāte haiñ

jo mil ga.e haiñ unheñ bhūlnā zarūrī hai
mile nahīñ haiñ jo chehre vo yaad aate haiñ

ye muddatoñ ke baad jo kahī ġhazal 'hilāl'
vo kaun hai jo aaj yaad aa gayā mujhe

dil bhī pazhmurda hai āñkheñ muzmahil
yaad bas terī javāñ hai āj-kal

yaad rakhnā to hai kamāl tirā
bhuul jaane kī ādateñ mat pūchh

sab sabr-o-shakeb-o-hosh kho detā huuñ
kartā huuñ kisī ko yaad ro detā huuñ

vaqt ne ham ko agar patthar banā Daalā hai to ham kyā kareñ
yaad haiñ vo din bhī ham ko ham bhī jab mehr o vafā kā baab the