Tags-Yaad

mumkin nahīñ ki bazm-e-tarab phir sajā sakūñ
ab ye bhī hai bahut ki tumheñ yaad aa sakūñ

mahā-sāgar
tujh to yaad hai sachche zamānoñ se

ik tirī yaad kā sahārā thā
vo bhī ab ho ga.ī judā ham se

mai-kashoñ ne hī nahīñ DhūñDā mire ghar kā pata
shaiḳh sāhab bhī mujhe ab yaad farmāne lage

kaise kisī kī yaad hameñ zinda rakhtī hai
ek ḳhayāl sahārā kaise ho saktā hai

ghaTā uThī hai to phir yaad aa gayā 'anvar'
ajiib shaḳhs thā akasr udaas rahtā thā

muñh pher ke yuuñ chalī javānī
yaad aa gayā rūThnā kisī kā

thiiñ tumhārī jis pe navāzisheñ kabhī tum bhī jis pe the mehrbāñ
ye vahī hai 'aḳhtar'-e-muslimī tumheñ yaad ho ki na yaad ho

sher kiye mauzūñ to aise jin se ḳhush haiñ sāhib-e-dil
roveñ kuḌheñ jo yaad kareñ ab aisā tum kuchh 'mīr' karo

aate rahne ke liye shukriya ai yaad ki dost
maiñ hī mujrim huuñ tirī yaad meñ aayā na kabhī

kuchh nahīñ yaad ki shab raqs kī mahfil meñ 'zafar'
ham judā kis se hue kis se baġhal-gīr hue

'shauq' sā banda-e-āzād zamāne meñ kahāñ
aaj sunte haiñ ki vo yād-e-ḳhudā karte haiñ

zindagī yaad rakhnā ki do chaar din
maiñ tire vāste mas.ala bhī rahā

is tarah yaad tirī aa ke uchak le mujh ko
daf.atan bhiiḌ meñ chalte hue tanhā ho jā.ūñ

tū nahīñ yaad nahīñ koī nahīñ maiñ bhī nahīñ
aur kuchh aur maiñ kuchh aur akelā ho jā.ūñ

lahlahāte haiñ dard ke paude
ishq kā bāġh, yaad maalī hai

bhulāne kī tujh ko zarā kī jo koshish
tirī yaad aa.ī mujhe sau gunī hai

milne kā man nahīñ to bahānā nayā tarāsh
ab to mukālme bhī tire yaad ho ga.e

pahlī cigarette pahlā ḳhvāb aur pahlā ishq
in tīnoñ meñ ek bhī mujh ko yaad nahīñ

ab to un kī yaad bhī aatī nahīñ
kitnī tanhā ho ga.iiñ tanhā.iyāñ