Tags-Yaad

dil ko tire firāq kī aarzū yaad rah ga.ī
din vo mohabbatoñ ke bhī misl-e-rah-e-safar ga.e

mujh pe khultā hai tirī yaad kā jab bāb-e-tilism
tañg ho jaatā huuñ ehsās-e-farāvānī se

tasvīr hai tujh yaad siiñ ā.īna-e-dil aaj
hairat-vashī-e-dīda-e-be-ḳhvāb kī saugand

yaad se terī dil-e-nāshād apnā shaad hai
zikr terā mere dard-e-fikr kā darmāñ huā

is tarah aatī hai dil meñ un kī yaad
duur par jaise paḌīñ parchhā.iyāñ

har taraf ziist kī rāhoñ meñ kaḌī dhuup hai dost
bas tirī yaad ke saa.e haiñ panāhoñ kī tarah

bechainī baḌh jā.egī aur yaad kisī kī aa.egī
tum merī ġhazleñ gāoge jab ishq tumheñ ho jā.egā

yaad ā.eñgī bahut niiñd se bojhal palkeñ
shaam ke saath ye dukh aur ghanerā hogā

us kā to ek lafz bhī ham ko nahīñ hai yaad
kal raat ek sher kahā thā jo ḳhvāb meñ

qafas meñ mil gayā hai in dinoñ kuchh lutf hī aisā
ki bhūle se nahīñ aatī kabhī yād-e-chaman mujh ko

hamāre zehn meñ ye baat bhī nahīñ aa.ī
ki terī yaad hameñ raat bhī nahīñ aa.ī

jab barastī hai tirī yaad kī rañgīn phuvār
phuul khilte haiñ dar-e-mai-kada vā hotā hai

vo āñgan meñ lahrāte sāvan ke jhūle
rahe yaad har dam kabhī ham na bhūle

ek din zulf ke muñh par na chaḌhī ye kāfir
yād-e-kākul ko faqat sheva-e-jāsūsī hai

sharīk-e-hāl-e-dil-e-be-qarār aaj bhī hai
kisī kī yaad mirī ġham-gusār aaj bhī hai

kis ġhuncha-lab kī mujh ko yaad aa ga.ī hai is dam
jo tañg ho gayā hai mujh par fazā-e-ālam

ta.ajjub hai ta.alluq yaad rakhnā aur phir ārām se sonā
agar us ko bhulā paa.e nahīñ ab tak saverā kaise karte ho

lutf kar lutf ki phir mujh ko na dekhegā kabhī
yaad rakh yaad ki tū dar se uThātā hai mujhe

pahle ik yaad sī aa.ī ḳhalish jaañ ban kar
phir ye nashtar rag-e-ehsās meñ gahrā utrā

yaad kī dhuup to hai roz kī baat
haañ mujhe chāñdnī se ḳhatra hai