Tags-Yaad

'bedār' mujhe yaad usī kī hai shab-o-roz
ne baat kisī kī hai ne mazkūr kisī kā

kyuuñ ujāḌā zāhido but-ḳhāna-e-ābād ko
masjideñ kaafī na hotīñ kyā ḳhudā kī yaad ko

maiñ ne jin ke liye rāhoñ meñ bichhāyā thā lahū
ham se kahte haiñ vahī ahd-e-vafā yaad nahīñ

phir mirī yaad aa rahī hogī
phir vo dīpak bujhā rahī hogī

jab chale jā.eñge ham lauT ke sāvan kī tarah
yaad ā.eñge pratham pyaar ke chumban kī tarah

jaane kyā baat hai jalvoñ meñ tire jān-e-jahāñ
yaad aatā hai ḳhudā dekh ke sūrat terī

garmī se jo ḳhurshīd-e-qayāmat kī jaleñge
yaad aa.egā ye sāya-e-dīvār tumhārā

mere chehre kā sūraj use yaad hai
bhūltā hai palak par sitāra sā thā

kuchh roz use dekh ke yaad ā.eñgī chiḌiyāñ
kuchh roz ye TuuTā huā par tañg karegā

yaad haiñ chashm-e-navāzish ke vo paiham nashtar
ab to begāna-nigāhī kā bhī paiġhām nahīñ

yaad kar ke maiñ hañs rahī huuñ aaj
maiñ bhī tere liye dukhī thī kabhī

yaad hogā abhī talak tujh ko
maiñ bhī terī hī zindagī thī kabhī

yaad kā zaḳhm bhī ham tujh ko nahīñ de sakte
dekh kis ālam-e-ġhurbat meñ mile haiñ tujh se

kuchh ḳhabar hai tujhe o chain se sone vaale
raat bhar kaun tirī yaad meñ bedār rahā

baras rahī hai havā-e-tarab to yaad aayā
machal rahī hai fazā meñ navā-e-sīna bhī

jahāñ peñgeñ baḌhāte the shajar vo yaad karte haiñ
vo jhūle pūchhte haiñ ab tumheñ sāvan bulātā hai

koī hausla hai na mudda.ā koī aarzū hai na iltijā
mire dil meñ ik tirī yaad hai mire lab pe ik tirā naam hai

miTāte rahe avvalīñ yaad ko
ki jo naqsh thā naqsh-e-sānī meñ thā

ham ne yād-e-butāñ meñ dam toḌā
marte marte ḳhudā ko bhuul ga.e

un kī bātoñ ko yaad kartā huuñ
jo mirī iltijā ko bhuul ga.e