Tags-Azal

qayām-gāh na koī na koī ghar merā
azal se tā-ba-abad sirf ik safar merā

le ke aayā hai azal hī se 'nazar-siddīqī'
TuuTe kaae kī tarah apnā muqaddar sā.īñ

hashr meñ husn se 'ravish' shikva-e-rū-ba-rū ġhalat
roz-e-azal kī baat hai aaj hī yaad aa.e kyuuñ

azal ek pal meñ abad ban gayā hai
adam is tasavvur pe jhunjhlā rahā hai

makīñ kaunain meñ ho fil-haqīqat lā-makāñ bhī ho
azal se tā-abad qaa.em ayaañ bhī ho nihāñ bhī ho

azal se jo kashish-e-markazī ke the pāband
havā kī tarah vo kyā sair chār-sū karte

husn-e-azal kā jalva hamārī nazar meñ hai
jo tuur par huā thā dil-e-dīda-var meñ hai

sahar-e-azal ko jo dī ga.ī vahī aaj tak hai musāfirī
use tai kareñ to patā chale kahāñ kaun kis kī talab meñ hai

aa.ī nazar tajallī jab shāhid azal kī
zarroñ meñ jā ke chamkī phūloñ meñ jā ke jhalkī

maiñ qatra huuñ lekin ba-āġhosh-e-dariyā
azal se abad tak bahā jā rahā huuñ

yūsuf-e-husn kā husn aap ḳharīdār rahā
pahle bazār-e-azal misr kā bāzār rahā

haal thā haal na maazī thā na thā mustaqbil
az-azal tā-ba-abad jalva-ba-ra.anā.ī thā

ḳhatt-e-peshānī meñ saffāk azal ke din se
terī talvār se likkhī hai shahādat merī

bachpan kī niiñd TuuT ga.ī us kī chaap se
mere laboñ se naġhma-e-sub.h-e-azal gayā

taqdīr-e-azal aah to bhartī hogī
rūh-e-abadī dard se martī hogī

said huuñ roz-e-azal se ālam-e-asbāb kā
aur vā rakhtā huuñ siine meñ darīcha ḳhvāb kā

ishq roz-e-azal se matā-e-yaqīñ
husn hai aaj bhī bad-gumāñ dekhiye

tū to hai husn-e-azal aur mirā rañg-e-ġhazal
merī āvāz meñ bhī kuchh to asar jaane de

jin ko paane kī tamannā hai azal se mire saath
haath pahuñchā nahīñ un barg-o-samar tak ab bhī

roz-e-azal se insāñ hai khoj meñ ḳhudā kī
kis ko milā hai lekin us kā surāġh yaaro