Tags-Azal

maiñ azal se aayā to kyā milā jo maiñ jā.ūñgā to milegā kyā
mirī jab bhī dar-ba-darī rahī mirī ab bhī dar-ba-darī rahī

maiñ apne hijr meñ thā mubtalā azal se magar
tire visāl ne mujh se milā diyā hai mujhe

azal se ruuh jo phūñkī ga.ī hai zarroñ meñ
to ye samajh lo ki jalva use dikhānā thā

nukta yahī azal se paḌhāyā gayā hameñ
havvā barā.e-husn hai aadam barā.e-ishq

jitne haiñ kushtagān-e-ishq un ke azal se haiñ mile
ashk se ashk nam se nam ḳhuun se ḳhuun gil se gil

kyā kuchh na thā azal meñ na taalā jo the durust
ham ko dil-shikasta qazā ne dilā diyā

azal ḳhālī ḳhalā anjām āḳhir
abad ābād faanī be-yaqīnī

azal bābīl raavī ḳhuun aadam
abad qābīl saanī be-yaqīnī

kabhī makāñ kī taraf hai kabhī makīñ kī taraf
kisī kā ruḳh hai azal se mirī zamīñ kī taraf

qassam-e-azal ne na rakhā ham ko bhī mahrūm
garche na diyā koī hunar be-hunarī dī

be-amal logoñ se jab pūchho to kahte haiñ kī 'shān'
ham azal se qismat-e-nākām le kar aa.e haiñ

naqsha ajab hai us kā naqqāsh ne azal ke
matbū aisā chehra koī na phir banāyā

kisī kā zulf ko lahrā ke chalnā uf tauba
sharāb-e-nāb azal ke nashe meñ mast parī

azal se jabr o sadāqat kī jañg jaarī hai
abhī talak nahīñ mazlūm haare zinda haiñ

mahrūm-e-chaman murġh-e-qafas band-e-azal haiñ
sayyād ke pinjre meñ haiñ bachpan se pale ham

saath aayā koī merī na koī jā.egā saath
morid-e-lutf azal se huuñ maiñ tanhā.ī kā

makāñ merā azal se DhūñDhtī phirtī thī vīrānī
nihāyat shauq se kī dil ne ranj-o-ġham kī mehmānī

bisāt-e-dahr sahī jalva-gāh-e-husn-e-azal
nigāh-e-shauq fuġhāñ-sanj-e-tishnagī kyuuñ hai

azal se 'vajd' har qatre ke dil meñ
qayāmat-ḳhez tūfāñ maujzan hai

chhiḌī huī hai azal se dil o nigāh meñ jañg
mahāz ek hai lashkar badaltā jaatā hai