Tags-Azal

maiñ huuñ nāshād-e-azal ḳhair magar hairat hai
ishrat-ābād-e-jahāñ meñ bhī koī shaad nahīñ

thā azal se savāl ke andar
jo javāb ab savāl tak pahuñchā

azal se haiñ ushshāq mazbūh-e-husn
jo mānind-e-māhī kaTe haiñ gale

ishq meñ roz-e-azal se dil hai pāband-e-vafā
bhūlne vaale tujhe kyūñkar bhulā saktā huuñ maiñ

vo rahīn-e-lazzat-e-ġham huuñ maiñ na milī azal meñ jise tarab
maiñ hī us karam kā thā muntazir maiñ hī mustahiq thā magar nahīñ

kisī maqām pe dil ko sukūñ ho kyā ma.anī
jo be-qarār-e-azal hai vo be-qarār rahe

aur ant meñ judā.ī baḌī karb-nāk hai
tujh mujh meñ yuuñ to roz-e-azal se vifāq hai

azal se barse hai pākīzgī falak se yahāñ
numāyāñ hove hai phir shakl-e-bahan meñ vo yahāñ

vo ek lamha azal-tā-abad vahī lamha
vo mujh se kuchh na kahe maiñ bhī us se kuchh na kahūñ

vahī patthar lagā hai mere sar par
azal se jis ko sajde kar rahā huuñ

azal se ham ko 'hasan' intizār-e-sabza hai
jale haiñ baaġh to paude na.e lagā.e haiñ

azal se naam sunā hai sharāb-e-vahdat kā
kabhī hameñ bhī pilāo to koī baat bane

dil kī qismat meñ azal se thī likhī tishna-labī
kyuuñ na us chāh-e-zaqan se ye piyāsā phirtā

dast-e-ḳhirad se parda-kushā.ī na ho sakī
husn-e-azal kī jalva-numā.ī na ho sakī

dil kī raushnī le kar dilbar-e-azal ko maiñ
DhūñDhtā huuñ muddat se aur nishāñ nahīñ miltā

jalva-e-husn-e-azal aa.e tasavvur meñ agar
gosha-e-dil meñ machalte hue armāñ hoñge

azal se dasht-o-bayābāñ meñ ghūmtī hai hayāt
kabhī naqāb se haT kar kabhī naqāb ke saath

dāstān-e-zindagī bhī kis qadar dilchasp hai
jo azal se chhiḌ gayā hai us fasāne kī kaho

ye qabl o ba.ad ke us paar kī hikāyat hai
mirā davām azal aur abad nahīñ rakhtā

ye rahravān-e-zindagī ḳhabar nahīñ kahāñ ga.e
vo kaun sā jahān hai azal nahīñ abad nahīñ