Tags-Azal

na bayāñ ho jo mile sub.h-e-azal shām-e-abad
hashr hai beach kā TukḌā mire afsāne kā

mire azal aur abad meñ nahīñ hai fasl koī
abhī shurūa abhī ḳhatm ho gayā huuñ maiñ

roz-e-azal se apnī jabīñ meñ taḌap rahī
vābasta yuuñ rahe haiñ tire sañg-e-dar se ham

tire roz-e-azal se farefta haiñ tire husn-o-jamāl ke shefta haiñ
tire ishq meñ ho ga.e kushta-e-ġham vahī kar ga.e qaul jo yaar kiyā

ye jo ārzūoñ kā des hai ye jo ḳhaak ḳhaak sā bhes hai
jo azal abad kā ye bhed hai use bhed hī meñ batā piyā

maiñ azal se chal rahā huuñ thak gayā huuñ sochtā huuñ
kyā tirī duniyā meñ har manzil nishān-e-rahguzar hai

husn ne roz-e-azal jab ruḳh se sarkā.ī naqāb
chand jalve rañg ban kar bazm-e-imkāñ ho ga.e

dasht-e-azal se dasht-e-abad tak chhān chukā meñ ḳhaak
aur kahāñ le jā.eñge ab bhaTkāne alfāz

azal se tā-ba-abad ek hī kahānī hai
isī se ham ko na.ī dāstāñ banānī hai

azal se ham-nafasī hai jo jān-e-jāñ se hameñ
payām dam-ba-dam aatā hai lā-makāñ se hameñ

ai qissa-go azal se jo biitī hai vo sunā
kuchh log tere fan ke parastār aa.e haiñ

qassam-e-azal ne to baḳhshī aadam ko matā-e-izz-o-sharf
ai gardish-e-daurāñ ye to batā kyā azmat-e-insāñ kuchh bhī nahīñ

chāñd ne mujh se kahā ai shā.er-e-fikr-e-azal
mere baare meñ bhī likh de koī sanjīda ġhazal

ik dard ke dhāge meñ piro.e haiñ azal se
is rishta-e-mauhūm se kaT kar nahīñ dekhā

haa.il hai jo azal se mire hāl-o-qāl meñ
vo bhī ayaañ nifāq huā hai kabhī kabhī

māyūs-e-azal huuñ ye maanā nākām-e-tamannā rahnā hai
jaate ho kahāñ ruḳh pher ke tum mujh ko to abhī kuchh kahnā hai

sadiyoñ kī maiñ kashīd huuñ ai sāqī-e-azal
mere vajūd ko bhī kabhī sarf-e-jām kar

azal se soḳhta-sāmāñ huuñ fikr-e-āshiyāñ kyā ho
na girtī barq to ye soz-e-dil se jal gayā hotā

mirī hastī nahīñ mahdūd hargiz chand lamhoñ tak
azal se tā-abad jaarī rahegā silsila merā

azal the hai muje ḳhūbāñ suuñ iḳhlās
abad lag muj hai mahbūbāñ suuñ iḳhlās