Tags-Zindagi

ġham mirī zindagī meñ TuuT girā
varna ye shor-dār naddī thī

ham bhī 'aslam' isī gumān meñ haiñ
ham ne bhī koī zindagī jī thī

zindagī ġham kī aañch sah koī
yuuñ jalī yuuñ bujhī ki dhuul huī

ham ko bhī ḳhush-numā nazar aa.ī hai zindagī
jaise sarāb duur se dariyā dikhā.ī de

talḳhi-e-zindagī are tauba
zahr meñ zahr kā mazā na milā

zindagī is qadar kaThin kyuuñ hai
aadmī kī bhalā ḳhatā kyā hai

mirī ik zindagī ke kitne hisse-dār haiñ lekin
kisī kī zindagī meñ merā hissa kyuuñ nahīñ hotā

zindagī ko hausla dene ke ḳhātir
ḳhvāhishoñ ko reza reza chun rahā huuñ

thā jis meñ zindagī kā gumāñ vo to jā chukī
ye zindagī hai us ke qadam kā ġhubār dost

jo zindagī thī laġhzish-e-paiham kā silsila
hai jumbish-e-ḳhafīf use nāgavār dost

thī zindagī ḳhudā kā ġhazab aur 'maz.harī'
maut ik ḳhudā kā pyaar hai le us kā pyaar dost

milī hai zindagī to ham ne sochā
hameñ kaisā yahāñ kirdār karnā

zindagī se yuuñ to samjhauta kiyā sab ne magar
jis ne jiine kī qasam khaa.ī vahī zinda rahā

kasāfat-e-zindagī kī zulmat meñ sham-e-haq zau-fishāñ ho kaise
jahāñ kī bujhtī huī nigāhoñ ko jagmagātā hai bām-e-nānak

vo zindagī hai mohabbat ki jis ke zer-e-asar
nafas nafas meñ ho ik maut umr-bhar ke liye

hazār baar miTī aur pā.emāl huī hai
hamārī zindagī tab jā ke be-misāl huī hai

ġham-e-zindagī sahī jāñ-gusil magar is se koī bachā bhī hai
yahī ġham hai rāz-e-nashāt-e-dil yahī zindagī kā mazā bhī hai

na tū uzv-e-jāh pe faḳhr kar ki ye zindagī to hai ik safar
tujhe kyā ḳhabar are be-ḳhabar dabe paañv pīchhe qazā bhī hai

jo bahār fasl-e-shabāb thī vo misāl-e-abr guzar ga.ī
nahīñ zindagī meñ koī ḳhushī ki ḳhilāf mere havā bhī hai

kabhī khole to kabhī zulf ko bikhrā.e hai
zindagī shaam hai aur shaam Dhalī jaa.e hai