Tags-Zindagi

zindagī pūchhte ho kyā mujh se
qahqahoñ kā fuġhāñ meñ rahnā hai

zindagī meñ jo tumheñ ḳhud se ziyāda the aziiz
un se milne kyā kabhī jaate ho qabristān bhī

zindagī dhuup meñ jalte hue kaaTī jis ne
saaya mil jaa.e koī us ko duā dī jaa.e

zindagī kī hai alāmat laġhzish
kyuuñ bahar-gām sambhalte rahiye

har samt zindagī kā tamāshā bhī ḳhuub hai
duniyā bhī ḳhuub raunaq-e-duniyā bhī ḳhuub hai

pī kar sharāb gum maiñ rahūñ apne hosh meñ
ai zindagī ye terā taqāzā bhī ḳhuub hai

vo bhalā sā naam thā kyā kahūñ mujhe ḳhud bhī yaad nahīñ rahā
mirī zindagī ke qarīb meñ vo jo ek musht-e-ġhubār hai

zindagī ko maut hai jab zindagī ḳhud ho fareb
maut bhī goyā fareb-e-hastī-e-mauhūm hai

zindagī us kā zikr sunte hī
aa ga.ī ishti.āl meñ ai dost

zindagī ko kar gayā jañgal koī
le gayā ḳhushiyoñ kā merī pal koī

zindagī thī ek sahrā kī tarah
zindagī ko kar gayā jal-thal koī

ḳhudā muaaf kare zindagī banāte haiñ
mire gunāh mujhe aadmī banāte haiñ

zarūrī to nahīñ ham zindagī meñ
mohabbat kā samar paa.eñ mohabbat

chal rahe haiñ dil meñ naḳhlistān kā armāñ liye
ham musāfir zindagī ke tapte registān ke

dil ke dāman meñ jo sarmāya-e-afkār na thā
zindagī thī magar us kā koī me.aar na thā

ki tujh se mil kar kabhī na bichhḌūñ
na aaj tujh meñ vo zindagī thī

zindagī ḳharāb ho ga.ī
aur be hisāb ho ga.ī

kāhish-e-ārzū sahī hāsil-e-zindagī magar
hāsil-e-ārzū hai kyā soz-e-mudām ke sivā

vo āsmāñ the ki āñkheñ sameTtīñ kaise
vo ḳhvāb the ki mirī zindagī meñ Dhalte kyā

zindagī kuchh bhī sahī phir bhī baḌī daulat hai
maut sī shai bhī yahāñ jins-e-girāñ hai ki nahīñ