Tags-Zindagi

ishq kyā hai bebasī hai bebasī kī baat kar
ye bhī koī zindagī hai zindagī kī baat kar

zindagī se rishta apnā toḌ kar
jā rahe ho jab to ye sāmān kyā

ḳhvāhishoñ ke sab parinde uḌ ga.e
ho ga.ī hai zindagī vīrān kyā

zindagī raat ke phaile hue sannāTe meñ
duur haTte hue qadmoñ kā nishāñ hai ab ke

jaise guzre guzār de is ko
zindagī muḳhtasar hai tuul nahīñ

apne man meñ Duub kar pā jā surāġh-e-zindagī
tū agar merā nahīñ bantā na ban apnā to ban

kis qadar rañgīñ hai tartīb-e-kitāb-e-zindagī
is meñ afsāna hai shāyad tere husn-o-nāz kā

qazā se qarz kis mushkil se lī umr-e-baqā ham ne
matā-e-zindagī de kar kiyā ye qarz adā ham ne

zindagī to kisī rahzan kī tarah thī 'anjum'
maut rahbar kī tarah raah dikhāne aa.ī

koī ḳhāmosh zaḳhm lagtī hai
zindagī ek nazm lagtī hai

ajiib karb sā hai zindagī ke chehre par
añdherā jaise kisī raushnī ke chehre par

ġham-e-zindagī maiñ tujh par dil o jaañ nisār kar duuñ
ġham-e-ārzū meñ Dhal kar tū jo ek baar aa.e

tire ishq kī badaulat koī rañj ho ki rāhat
sar-e-zindagī jo aa.e sabhī yādgār aa.e

varna vahī ujaaḌ havelī sī zindagī
tum aa ga.e to vaqt Thikāne se kaT gayā

kaash hāsil ho haqīqī zindagī kā ek din
sarḳhushī kā ek lamha yā ḳhushī kā ek din

vo sarḳhushī de ki zindagī ko shabāb se bahara-yāb kar de
mire ḳhayāloñ meñ rañg bhar de mire lahū ko sharāb kar de

tumheñ kabhī na kabhī mar ke bhī dikhā dūñgā
jo zindagī ne vafā kī jo barqarār rahā

hai zindagī baġhair tumhāre ik iztirāb
de do ise sabāt mirī baat maan lo

saarī rusvā.ī zamāne kī gavārā kar ke
zindagī jiite haiñ kuchh log ḳhasārā kar ke

zindagī to kabhī nahīñ aa.ī
maut aa.ī zarā zarā kar ke