Tags-Zindagi

zindagī sāya-e-dīvār nahīñ daar bhī hai
ziist ko ishq ke ādāb sikhāte jaao

ye shukr hai ki mire paas terā ġham to rahā
vagarna zindagī bhar ko rulā diyā hotā

ḳhushā ki ahd-e-qafas meñ bhī zindagī ke liye
nigāh kheltī rahtī hai āshiyāne se

lahū lahū na karo zindagī ke chehre ko
sitamgaroñ kī navāzish se duur ho jaao

ye zindagī to fareboñ kā aa.ina Thahrī
ab apnī khoj meñ bhaTko farār ho jaao

yahī andāz haiñ to ġham nahīñ kuchh buad-e-manzil kā
umañgeñ jaag uThī haiñ zindagī sī kārvāñ meñ hai

yuuñ to marne ke liye zahr sabhī piite haiñ
zindagī tere liye zahr piyā hai maiñ ne

kis darja dil-shikan the mohabbat ke hādse
ham zindagī meñ phir koī armāñ na kar sake

zindagī aur maut meñ ik umr se thī kashmakash
vaqt par do hichkiyoñ ne paak jhagḌā kar diyā

jo samajhtā hai zindagī ke rumūz
maut kā dar vo be-ḳhatar khole

hai 'kañval' ḳhauf rā.egānī kā
kaise is zindagī kā Dar khole

zindagī ko mah-o-anjum na ujālā deñge
tum na in jhūTe khilaunoñ se bahalte rahnā

pūchho na kis tarah se guzārī hai zindagī
maddham se ik diye ne havā meñ safar kiyā

yaar kyā zindagī hai sūraj kī
sub.h se shaam tak jalā karnā

mirī lau lagī hai tujh se ġham-e-zindagī miTā de
tirā naam hai masīhā mire dard kī davā de

ham un kī har baat maan lete to zindagī chain se guzartī
bas izzat-e-nafs roktī hai anā kā ye mas.ala nahīñ hai

jo mil gayā vo nasīb samjhā jo mil na paayā sarāb jaanā
guzār leñ jo bhī zindagī hai ki kal kā koī pata nahīñ hai

ek mushkil ho to āsān banā lī jaa.e
us ne to zindagī dushvār banā rakkhī hai

ghabrā ke mar na jā.iye marne se fā.eda
ik aur zindagī bhī hai is zindagī ke ba.ad

pahle hāthoñ meñ haath rahtā thā
zindagī ab kamar pe baiThī hai