Tags-Zindagi

un kī mastāna nigāhoñ kā nahīñ koī qusūr
nāseho zindagī ḳhud ham se sañvārī na ga.ī

mas.ale to zindagī meñ roz aate haiñ magar
zindagī ke mas.aloñ kā hal nikalnā chāhiye

chehra tamām zindagī tasvīr ek pal
itne tavīl ḳhvāb kī ta.abīr ek pal

mil jaa.e ek raat mohabbat kī zindagī
phir ḳhvāhish-e-hayāt hameñ umr-bhar nahīñ

zindagī ke hasīn chehre par
ġham ne kitne hijāb Daale haiñ

zindagī tū ne hameñ aur bhī maqrūz kiyā
jab bhī ham log tirā qarz chukāne nikle

ba-har-unvāñ mohabbat ko bahār-e-zindagī kahiye
qarīn-e-maslahat hai us ke har ġham ko ḳhushī kahiye

chāhtā huuñ maiñ 'munīr' is umr ke anjām par
ek aisī zindagī jo is tarah mushkil na ho

maiñ jin se duur hī rahnā pasand kartā thā
vo zindagī kī masāfat meñ baar baar mile

tere ḳhirām-e-nāz pe qurbān zindagī
naqsh-e-qadam ko raunaq-e-vīrāna kar diyā

zindagī kī gahmāgahmī ne ye fursat hī na dī
ham hathelī par likhā apnā muqaddar dekhte

kitnī tahzīboñ kā madfan hai hamārī zindagī
jagmagā.e shahr meñ lekin khañDar dekhegā kaun

girya kī saltanat mujhe degī shikast kyā
chhīnī hai maiñ ne zindagī paanī ke taḳht se

zulf-e-barham kī jab se shanāsā huī
zindagī kā chalan mujrimāna huā

kaash tum samajh saktīñ zindagī meñ shā.er kī aise din bhī aate haiñ
jab usī ke parvarda chāñd us pe hañste haiñ phuul muskurāte haiñ

tum ne kab ye samjhā thā maiñ ne kab ye sochā thā zindagī kī rāhoñ meñ
chalte chalte do raahī ek moḌ par aa kar ḳhud hī chhūT jaate haiñ

tumheñ jo sochā to rashk aayā zindagī pe hameñ
tumheñ jo dekhā to tasvīr ho ga.e ham log

aisā bhī nahīñ ki mujhe zindagī ke peḌ ke paas
be-ās aur be-sahārā chhoḌ diyā gayā ho

zindagī lutf bhī hai zindagī āzār bhī hai
sāz-o-āhañg bhī zanjīr kī jhankār bhī hai

aish-o-ishrat hī meñ kuchh hai zindagī
marg hai be-yār o be-mai zindagī